Deklaratsııaǵa qajetti málimetterdi jınap úlgermegender ne isteýi kerek – MKK túsindirmesi
ASTANA. KAZINFORM – Deklaratsııaǵa qajetti barlyq málimetti jınap úlgermegen qazaqstandyqtar 270.00 nysanyndaǵy kirister men múlik týraly deklaratsııany belgilengen merzimde tapsyryp, keıin derekterdi túzete alady. Bul týraly Memlekettik kirister komıteti Jeke tulǵalardyń kiristerin ákimshileý basqarmasynyń bas sarapshysy Gúlden Hasenova aıtty.
Onyń málimetinshe, 2025 jylǵa arnalǵan deklaratsııany tapsyrý merziminiń aıaqtalýyna shamamen úsh apta qaldy. 270.00 nysanyn 15 qyrkúıekten keshiktirmeı tapsyrý qajet. Alaıda keıbir azamattar jyl ishinde múlikpen birneshe mámile jasaǵan jaǵdaıda qıyndyqqa tap bolýy múmkin.
— Mysaly, keıbir azamat qajetti málimetterdi suratyp alýǵa úlgermeı qalýy yqtımal. Kólik satqan kezde adamnyń ony kimge satqanyn esine túsire almaı qalatyn jaǵdaılar jıi kezdesedi. Al deklaratsııada satyp alýshynyń JSN-in, aty-jónin jáne kólikti qansha somaǵa satyp alǵanyn kórsetý qajet. Sondyqtan azamat bastapqy deklaratsııasyna túzetý engizip, talap qoıý merzimi úsh jyl ishinde qosymsha deklaratsııa tapsyra alady, — dep túsindirdi ol MKK paraqshasyndaǵy tikeleı efır barysynda.
Deklaratsııany myna azamattar tapsyrýy tıis:
• memlekettik qyzmetshiler, olarǵa teńestirilgen tulǵalar jáne olardyń jubaılary;
• zańdy tulǵalardyń basshylary, quryltaıshylary men qatysýshylary, sondaı-aq olardyń rezıdent jubaılary;
• bankterdiń, saqtandyrý uıymdarynyń jáne baǵaly qaǵazdar naryǵynyń iri qatysýshylary;
• jeke praktıkamen aınalysatyn tulǵalar: notarıýstar, jeke sot oryndaýshylary, medıatorlar jáne advokattar;
• 2025 jyly jalpy quny 20 myń AEK-ten (86,5 mln teńge) asatyn múlik pen basqa da aktıvter satyp alǵan qazaqstandyqtar;
• salyq agentinen belgili bir salyqtyq shegerimderdi qoldanǵan tulǵalar;
• tsıfrlyq aktıv ıeleri;
• óz betinshe deklaratsııalap, salyq tóleýdi qajet etetin kiris alǵan azamattar.
Quny 20 myń AEK-ten asatyn múlikti satyp alýǵa qatysty talap Qazaqstandaǵy aktıvterge de, sheteldegi aktıvterge de qoldanylady.
270.00 nysanynda mynalar kórsetilýi qajet:
• debıtorlyq jáne kredıtorlyq bereshek;
• salyqtyq shegerimder;
• óz betinshe salyq salynýǵa jatatyn kirister, mysaly, múlikti satý kezinde qun ósiminen alynǵan tabys;
• 2025 jylǵy 31 jeltoqsandaǵy jaǵdaı boıynsha quny 1000 AEK-ten (4,325 mln teńge) asatyn sheteldegi aktıvter;
• baǵaly qaǵazdar jáne sheteldik kompanııalardaǵy qatysý úlesteri;
• múlikti satyp alý jáne ıelikten shyǵarý týraly málimetter.
— Eger adam óz betinshe salyq salynýǵa jatatyn kiris alsa, ony ony 270-nysanda kórsetýi qajet. Mysaly, ol jyljymaıtyn múlikti 10 mln teńgege satyp alyp, keıin ony 15 mln teńgege satsa, alynǵan kiristi deklaratsııada kórsetýi kerek. Sondaı-aq 2025 jylǵy 31 jeltoqsandaǵy jaǵdaı boıynsha sheteldegi aktıvterdi de deklaratsııada kórsetý qajet. Mysaly, adamnyń Túrkııada páteri nemese Shveıtsarııa bankindegi shotynda 500 myń eýrosy bolsa, bul málimetterdi 270-nysanǵa engizý qajet, — dep túsindirdi Gúlden Hasenova.
Qazaqstanda jeke múddeler týraly deklaratsııany kim jáne qashan toltyrýy kerek ekenin jazǵan edik.
