Deklaratsııada anyqtalmaǵan jasyryn tabys mobıldi aýdarymda kórinýi múmkin – maman
ASTANA. KAZINFORM – Mobıldi aýdarymdy aıtqanda, jalpyǵa birdeı deklaratsııalaýdy da qosa aıtý kerek, eki joba qatar júrgizilip kele jatyr. Bul týraly Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly aıtyp berdi.
Onyń aıtýynsha, mobıldi aýdarymdardy baqylaýdyń negizi maqsaty – kóleńkeli bıznesti anyqtaý, kóleńkeli ekonomıka deńgeıin tómendetý jáne sybaılas jemqorlyqtyń aldyn alý.
− Mobıldi aýdarymdy aıtqanda, jalpyǵa birdeı deklaratsııalaýdy da qosa aıtý kerek. Bul eki sharanyń da maqsattary bir, deklaratsııalaý kezinde anyqtalmaǵan kiristerdi mobıldi aýdarymdar arqyly anyqtaýǵa múmkindik bar. Sondyqtan bul eki shara qatar qoldanylsa, kóleńkeli ekonomıka men sybaılas jemqorlyqtyń aldyn alýǵa bolady, − dedi Ersaıyn Kóptileýuly agenttiktiń «Bizdin orta» podkastynda.
Jalpyǵa birdeı deklaratsııalaý 4 kezeń boıynsha júzege asyrylyp jatyr. Sol sııaqty mobıldi aýdarymdardy baqylaý da kezeń-kezeńimen júrgizilip jatyr.
− 2021 jyly deklaratsııalaýdyń 1-kezeńinde memlekettik qyzmetshiler, oǵan teńestirilgen jandar jáne olardyń jubaılary tapsyrdy. Al olardyń mobıldi aýdarymdaryn biz 2022 jyly teksere bastadyq. ıAǵnı 2023 jyly bankter 1-kezeńdegi tulǵalardyń ólshemsharttan asyp ketý derekterin berdi. Ekinshi kezeńde deklaratsııany memlekettik mekemelerdiń, kvazımemlekettik sýbektilerdiń jumysshylary jáne olardyń jubaılary tapsyrdy. Tıisinshe sol kisilerdiń mobıldi aýdarymdaryn 2024 jyly aldyq, - dep túsindirdi spıker.
Bıyl 2025 jyly deklaratsııalaýdyń 3-kezeńine kirgen jeke kásipkerler, zańdy tulǵalar basshylary jáne olardyń jubaılarynyń aýdarymdary qosa tekseriledi jáne shamadan tys aýdarymdar týraly aqparat keledi.
Al 2026 jyldan bastap, eldegi basqa da azamattar boıynsha málimetter joldanatyn bolady.
− Qazir Prezıdent tapsyrmasymen deklaratsııalaýdyń 4-kezeńiniń kontseptsııasy qaıta qaralyp jatyr. Jalpyǵa birdeı deklaratsııalaý kontseptsııasy 2010 jyly ázirlengen, 14 jylda memlekettik mekemelerdiń derekter bazasy barynsha keńeıtildi. Sondyqtan osy múmkindikterdi paıdalanyp, 4-kezeń deklaranttaryn bosatý máselesi qaralyp jatyr, - dedi maman.
Degenmen barlyq másele eldegi salyq mádenıetine kelip tireledi.
− Árbir azamat óz eliniń patrıoty retinde salyq tóleýge mindetti. Memleketimizdiń tiregi, bıýdjettiń negizgi bóligi – salyq ekeni jasyryn emes. Sondyqtan ár adamnyń salyq mádenıetin qalyptastyrýymyz kerek. Óıtkeni salyq mádenıetiniń tómendiginen osyndaı baqylaý sharalary engizilip jatyr, - dedi E.Kóptileýuly.
Az somada mobıldi aýdarym alǵandarǵa salyq salmaý usynylǵanyn jazǵan bolatynbyz.