Deklaratsııa usynbaǵan qazaqstandyqtar qandaı jaýapkershilikke tartylady
Memlekettik kirister komıteti Óndiristik emes tólemderdi, jeke tulǵalardy jáne arnaýly salyqtyq rejımderdi ákimshileý departamentiniń dırektor Nurjan Qýandyqov deklaratsııa usynbaǵandarǵa qandaı shara qoldanylatynyn aıtty, dep habarlaıdy Kazinform.
«Deklaratsııany birinshi ret usynbaǵany úshin – eskertý, bir jyl ishinde qaıtalap buzǵany úshin 51 750 teńge kóleminde aıyppul salynady. Deklaratsııada tolyq emes nemese anyq emes málimetterdi birinshi ret usynǵany úshin – eskertý, bir jyl ishinde qaıtalap buzǵany úshin 10 350 teńge kóleminde aıyppul salynady. Jyl ishinde birinshi ret salyq obektilerin jasyrǵany úshin – tólenbegen salyq somasynyń 200 paıyz mólsherinde aıyppul, qaıtalap buzýshylyq úshin 300 paıyz mólsherinde aıyppul salynady», - dedi ol.
Osy oraıda ol jeke tabysqa salyqtyq baqylaý qalaı júzege asyrylatynyn túsindirdi.
«Sonymen, birinshiden kameraldyq baqylaý júrgiziledi – jeke tulǵalardyń shyǵyndary osylaısha baqylanady. Deklaratsııanyń bar-joqtyǵy tekseriledi. Deklaratsııada tabys pen múlikti kórsetpeý jáne kiristi azaıtyp kórsetý faktisi anyqtalady. Odan keıin kameralyq baqylaý nátıjeleri boıynsha buzýshylyqtardy joımaǵan azamattarǵa qatysty salyqtyq tekserý júrgiziledi», - dedi Nurjan Qýandyqov.
