Deklaratsııa tapsyrmaǵan jeti blogerge qatysty is sotqa jetti
ASTANA. KAZINFORM — Tabysy týraly deklaratsııa tapsyrý daýyna qatysty 7 blogermen sot protsesi júrip jatyr. Bul týraly Qarjy mınıstri Mádı Takıev málim etti.
— 854 blogerge deklaratsııa tapsyrý týraly habarlama joldandy jáne 620 bloger qosymsha 18,141 mlrd teńgege deklaratsııa tapsyrdy. Qazir 234 blogermen jumys istep jatyrmyz, ıaǵnı tolyqqandy qujat tekseriledi. Sondaı-aq búginde 7 blogerge qatysty sot protsesi júrip jatyr, — dep jaýap berdi Mádı Takıev Úkimet úıinde ótken baspasóz máslıhatynda.
Osy oraıda Qarjy mınıstri barlyq blogerdi bıznes júrgizý barysynda muqııat bolýǵa shaqyryp otyr.
Aıta ketsek, bıyl aqpannan bastap Memlekettik kirister komıteti tabysyn tómen kórsetken 594 blogerge qatysty 53,3 mlrd teńgeniń habarlamasyn jibere bastady. Tekserý, salystyrý qorytyndysy boıynsha 594 tulǵanyń tabysynda 53,3 mlrd teńgege sáıkessizdik anyqtalǵan.
Keıin tabysyn tómen kórsetip salyqtan jaltarǵan qazaqstandyq blogerler kirisin rastap, salyq tóleı bastaǵany belgili boldy.