Deklaratsııa usynbaǵan jeke tulǵaǵa qandaı jaza qoldanylady

ASTANA. QazAqparat – Astana qalasy boıynsha Memlekettik kirister departamenti basshysynyń orynbasary Qanat Baltabekov deklaratsııa usynbaǵan jeke tulǵalarǵa qandaı jaýapkershilik qarastyrylǵanyn aıtty, dep habarlaıdy QazAqparat tilshisi.

«Aktıvter men mindettemeler týraly deklaratsııany usynbaǵan jaǵdaıda ákimshilik jaýapkershilik kózdelgen. «Ákimshilik quqyq buzýshylyq týraly» Qazaqstan Respýblıkasy kodeksiniń 272-babynyń 1-tarmaǵyna sáıkes aktıvter men mindettemeler týraly deklaratsııany Qazaqstan Respýblıkasynyń zańnamalyq aktilerinde belgilengen merzimde usynbaý aldyn ala eskertýge ákep soǵady. 1 jyl ishinde qaıtalap jasalǵan áreketter 15 aılyq eseptik kórsetkish (1 AEK - 3450 teńge) mólsherinde aıyppul salýǵa ákep soǵady. Jalpyǵa birdeı deklaratsııalaý boıynsha suraqtar týyndaǵan jaǵdaıda jeke tulǵalar 1414 nómiri boıynsha biryńǵaı baılanys ortalyǵynan keńes ala alady»,- dedi Qanat Baltabekov Astana qalasynyń kommýnıkatsııalar qyzmetindegi brıfıngte.

Atalǵan departamentke qarasty jalpyǵa birdeı deklaratsııalaý jáne óndiristik emes tólemder bóliminiń basshysy Erasyl Borashtyń aıtýynsha, deklaratsııa 12 tarmaqtan turady. Deklaratsııany 15 qyrkúıekke deıin «salyq tóleýshiniń kabıneti» cabinet.salyk.kz arqyly,«elektrondyq úkimet» portaly, sondaı-aq esalyq azamat mobıldik qosymshasy arqyly elektrondy túrde, al qaǵaz úlgide 15 shildege deıin berýge bolady.