Deklaratsııa tapsyrý merziminiń aıaqtalýyna 12 kún qaldy

ASTANA. QazAqparat - Memlekettik kirister komıteti 15 qyrkúıekte jalpyǵa birdeı deklaratsııalaýdyń ekinshi kezeńiniń deklaratsııasyn elektrondy tapsyrý merzimi aıaqtalatynyn eske saldy, dep habarlaıdy QazAqparat.

Bıyl aktıvter men mindettemeler týraly deklaratsııany (250.00-nysan) memlekettik mekeme, bıýdjettik uıymdar jáne kvazımemlekettik sektor sýbektileriniń shtattyq qyzmetkerleri, sondaı-aq olardyń jubaılary alǵash ret tabys etedi.

Mundaı uıymdarǵa azamattyq-quqyqtyq sıpattaǵy shart boıynsha qyzmet kórsetetin jeke tulǵalar jáne olardyń jubaılary (mundaı uıymdardyń shtattyq qyzmetkeri emester) 2023 jyly deklaratsııany tabys etpeıdi.

Deklaratsııany «Salyq tóleýshiniń kabıneti» (cabinet.salyk.kz), «elektrondy úkimet» portaly (egov.kz) kómegimen jáne e-Salyq Azamat, eGov mobile, Halyk mobıldi qosymshasy arqyly tapsyrýǵa bolady.

Jeke tulǵalar deklaratsııany turǵylyqty jerinde tabys etedi.

Aktıvter men mindettemeler týraly deklaratsııany tapsyrýdyń tolyq nusqaýlyǵy myna vıdeoda.