Deklaratsııa tapsyrý qaǵıdalaryn halyqqa keń aýqymdy túsindirý qajet - Mamın

NUR-SULTAN. QazAqparat – Jalpyǵa birdeı deklaratsııalaýdy engizý boıynsha jumysty bekitilgen merzimge sáıkes jalǵastyrý kerek. Bul týraly Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Jalpyǵa birdeı deklaratsııalaýdy engizý jeke tulǵalar tabysynyń ashyqtyǵyn qamtamasyz etedi. Bıylǵy jylǵy 1 qańtardan bastap memlekettik qyzmetshiler jáne olarǵa teńestirilgen adamdar úshin jalpyǵa birdeı deklaratsııalaýdy engizýdiń birinshi kezeńi bastaldy. 2023 jyldan bastap memlekettik mekemeler men kvazımemlekettik sektordyń qyzmetkerleri deklaratsııa tapsyra bastaıdy. Keıin, 2024 jyldan bastap zańdy tulǵalardyń basshylary men quryltaıshylary tapsyrady. Al 2025 jyldan bastap azamattardyń barlyq qalǵan sanattary tapsyra bastaıdy», - dedi Úkimet basshysy.

Bul rette Asqar Mamın deklaratsııa qabyldaıtyn elektrondyq servıster, atap aıtqanda salyq tóleýshiniń kabıneti, «Elektrondyq úkimettiń» veb-portaly jáne «E-Salyq Azamat» arnaıy mobıldik qosymshasy qazirden bastap jumys isteı bastaǵanyn aıtty.

«Osy rette, jalpyǵa birdeı deklaratsııalaýdy engizý boıynsha jumysty bekitilgen merzimge sáıkes jalǵastyrý kerek. Sonymen birge, deklaratsııany toltyrý jáne tapsyrý qaǵıdalary boıynsha halyq arasynda keń aýqymdy túsindirý jáne oqytý jumystaryn júrgizý qajet», - dedi Asqar Mamın.