DEF reıtıngisi: Qazaqstan eki kórsetkish boıynsha birinshi orynnan kórindi
QR Ulttyq ekonomıka mınıstrliginiń departament basshysynyń orynbasary Baýyrjan Turlybekovtiń aıtýynsha, reıtıngte «Infraqurylym» degen kórsetkish bar. Oǵan 12 faktor kiredi. Sonyń biri - elektr qýatymen qamtamasyz etýdiń qoljetimdiligi.
«Dál osy faktor boıynsha Qazaqstan birinshi orynǵa jaıǵasty. Budan bólek, biz «Aktsıonerlerdiń quqyqtaryn qorǵaý» kórsetkishi boıynsha birinshi oryndy alyp otyrmyz. Bul degenimiz, Qazaqstandaǵy ınvestıtsııalyq klımat jaqsy degendi bildiredi», - dedi B.Turlybekov Astanada ótken baspasóz máslıxatynda.
Aıta keteıik, Dúnıejúzilik ekonomıkalyq forým (DEF) 2018 jylǵy jahandyq básekege qabilettilik ındeksi (JBI) boıynsha jyl saıynǵy esebin jarııalady. 2008 jyly bastalǵan álemdik ekonomıkalyq daǵdarystyń saldaryn jáne tórtinshi ındýstrııalyq revolıýtsııanyń (4IR) damýyn eskere otyryp, 2018 jyly JBI ádistemesi aıtarlyqtaı ózgertildi.
Jańa 4.0 JBI ádistemesine sáıkes, negizgi ekpin statıstıkalyq ındıkatorlarǵa jasalady (olardyń úlesi 70%, al saýalnamalyq ındıkatorlardyń úlesi 30%-dy quraıdy). Sonymen qatar, barlyq faktorlardyń úles salmaǵy birdeı.
