DEF reıtıngindegi 15 kórsetkish boıynsha Qazaqstan álemniń jetekshi 30 eliniń quramynda tur
ASTANA. QazAqparat - Aǵymdaǵy jyly Qazaqstan Jahandyq básekege qabilettilik reıtınginde 42-i orynǵa kóterildi. Al on bes kórsetkish boıynsha elimiz álemniń damyǵan otyz eliniń qataryna kirip otyr. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Ulttyq taldaýlar ortalyǵy» AQ basqarma tóraıymy Aqtoty Aıtjanova osylaı málim etti.
«Qazaqstan bıylǵy jyly álemdik reıtıngte 42-i orynǵa kóterildi. Bul elimizdiń Dúnıejúzilik ekonomıkalyq forým reıtıngisine qatysyp júrgen 2005 jyldan bergi eń úzdik nátıje. Jalpy jaǵdaıdyń jaqsarýy barlyq baǵyttar boıynsha baıqalady: ınstıtýtsıonaldyq sektor, adamı kapıtal, sonymen birge, bul bıznesti retteý máselesine de qatysty», - dep atap ótti Ortalyq basshysy.
Onyń aıtýynsha, Qazaqstan álemdik reıtıngtegi 22 kórsetkish boıynsha elimizdiń jalpy reıtıngisindegi orynnan joǵary tursa, 15 kórsetkish boıynsha elimiz qazirdiń ózinde álemniń «top-30» elderiniń arasyna enip otyr.
Tutastaı alǵanda, álemdik básekege qabilettilik reıtınginde eń ozyq kórsetkishke Shveıtsarııa ıe, odan soń Sıngapýr memleketi tursa, úzdik úshtikti AQSh qorytyndylaıdy. Odan keıingi oryndarda Germanııa, Nıderlandy jáne Japonııa jaıǵasqan. Eýrazııalyq óńirde Qazaqstan - 42-orynda, Reseı - 45-shi, Grýzııa - 66-shy, al Ýkraına - 79-orynda. Bul rette sarapshylar, makroekonomıkalyq jaǵdaı boıynsha da Qazaqstannyń qýatty ekenin, elimizdegi eńbek naryǵynyń asa qarqyndy ekenin atap ótedi.
