DeepSeek resýrs jetispeýshiligine baılanysty chatqa kirýdi shektedi

ASTANA. KAZINFORM — Qytaıdyń DeepSeek jasandy ıntellektisin ázirleýshi kompanııa esepteý resýrsynyń jetispeýshiligine baılanysty qarapaıym paıdalanýshylar úshin chattyń mobıldi qosymsha men saıttaǵy chatbotty qoldanýǵa shekteýler engizdi, dep habarlaıdy Kazinform agenttiginiń Beıjińdegi menshikti tilshisi jergilikti BAQ-qa silteme jasap.

DeepSeek
Foto: mcafee.com

Paıdalanýshylarǵa platformanyń syıymdylyǵynyń jetispeýshiligine baılanysty jeti kúnnen astam ýaqyt boıy qoldanylmaǵan uzynnan-uzaq dıalogtardyń toqtatylatyny habarlandy. Mundaı sessııalardy endi jalǵastyrý múmkin emes.

Kompanııa sonymen qatar suraý uzyndyǵynyń shegin shamamen 40 000 tańbaǵa deıin qysqartty jáne kúndelikti kvotalar engizdi. Kúndelikti shekke jetkende, ekranǵa júıe serverge túsken júktemeniń artqany jáne kvotanyń taýsylǵany týraly habarlama shyǵady.

Bul shekteýlerdiń engizilýine tehnıkalyq aqaýlardyń kóbeıýi sebep bolyp otyr. Qazan aıynan beri chat qyzmetiniń, sondaı-aq V4 Pro jáne V4.1 Flash modelderiniń API ınterfeısteriniń ishinara jabylyp qalýyna baılanysty keminde bes oqıǵa tirkeldi. Eń uzaq kidiris 15 qazanda boldy jáne bes saǵatqa sozyldy.

Jańa shekteýler tek mobıldi qosymshalar men veb-nusqalarǵa qoldanylady. Al ázirleýshilerge arnalǵan baǵdarlamalyq ınterfeısti aqyly tarıf negizinde shekteýsiz qoldanýǵa bolady.

Jańa shekteýler engizilgennen keıin, áleýmettik jeli paıdalanýshylary DeepSeek-ti basqa iri tildik model ázirleýshileriniń úlgisine súıene otyryp, shekteýleri ulǵaıtylǵan jáne turaqtylyǵyna kepildik beriletin aqyly jazylymdardy engizýge shaqyrdy.

Eske sala keteıik, jazda DeepSeek $7,4 mlrd ınvestıtsııa tartyp, Qytaıdaǵy eń qymbat JI-startap atanǵan edi.

Al qazan aıynda DeepSeek-tiń negizin qalaǵan Lıan Venfen Qytaıdyń eń baı 10 kásipkeriniń biri boldy.