DeepSeek negizin qalaýshy Qytaıdyń eń baı 10 kásipkeriniń qataryna endi
ASTANA. KAZINFORM — Qytaılyq DeepSeek jasandy ıntellekt ázirleýshi kompanııasynyń negizin qalaýshy Lıan Venfen Hurun zertteý ınstıtýty jasaǵan Qytaıdyń eń baı kásipkerleri reıtınginde alǵash ret jetinshi orynǵa jaıǵasty, dep habarlaıdy Kazinform agenttiginiń Beıjińdegi menshikti tilshisi.
41 jastaǵy kásipker 2026 jylǵy reıtıngke jańadan engen 263 adamnyń ishindegi eń baıy atandy.
Hurun ınstıtýty Lıan Venfenniń baılyǵyn 280 mlrd ıýanǵa (42 mlrd dollar) baǵalaǵan. Bul rette esepteý kezinde 1 qyrkúıektegi aktıvter quny negizge alynǵan.
Hurun ókilderiniń túsindirýinshe, buǵan deıingi reıtıngke Lıan Venfen engizilmegen. Buǵan onyń DeepSeek jobasyn kommertsııalandyrýdan bas tartatyny týraly málimdemesi sebep bolǵan.
Al jańartylǵan esepte zertteý ınstıtýty kompanııanyń qunyn 50 mlrd dollardan joǵary baǵalady.
Hurun zertteý ınstıtýty jyl saıyn Qytaıdyń eń baı adamdarynyń reıtıngin jarııalap otyrady. Bul tizim Forbes reıtınginiń Qytaıdaǵy balamasy sanalady ári eldiń jeke sektoryndaǵy baılyq kólemin baǵalaýdaǵy negizgi kórsetkishterdiń biri bolyp esepteledi.
Buǵan deıin AQSh Іshki qaýipsizdik mınıstrligi azamattyq memlekettik mekemelerge qytaılyq DeepSeek platformasyn jáne onyń negizinde ázirlengen barlyq servısti memlekettik júıelerden alyp tastaýdy tapsyrdy.
Sonymen qatar DeepSeek $7,4 mlrd ınvestıtsııa tartyp, Qytaıdaǵy eń qymbat JI-startap atanǵanyn jazǵanbyz.
