DeepSeek $7,4 mlrd ınvestıtsııa tartyp, Qytaıdaǵy eń qymbat JI-startap atandy
ASTANA. KAZINFORM – Qytaıdyń jasandy ıntellekt ázirleýshisi DeepSeek alǵashqy ınvestıtsııalyq raýnd aıasynda $7,4 mlrd-tan astam qarjy tartty. Mámileden keıin kompanııanyń quny $50 mlrd-tan asyp, ony Qytaıdaǵy eń qymbat jasandy ıntellekt startapyna aınaldyrdy, dep habarlaıdy Reuters.
Qarjylandyrý DeepSeek negizin qalaýshy Lıan Venfenniń kompanııany baqylaýda ustaýyna múmkindik beretin arnaıy shema boıynsha uıymdastyrylǵan.
Investorlarǵa qarjyny tikeleı kompanııaǵa emes, startap basshysy basqaratyn jaýapkershiligi shekteýli seriktestik arqyly salý usynyldy.
Sonymen qatar ınvestıtsııalyq raýndqa qatysýshylar bes jyl boıy óz úlesterin sata almaıdy jáne korporatıvtik sheshimderdi qabyldaý kezinde daýys berý quqyǵyna ıe bolmaıdy.
Bul talaptar Qytaıdyń Jasandy ıntellekt jónindegi ulttyq ınvestıtsııalyq qory úshin qoldanylmady. The Information basylymynyń málimetinshe, qor DeepSeek-ke tikeleı ınvestıtsııa salyp, daýys berý quqyǵyn jáne óz úlesine erkin ıelik etý múmkindigin saqtap qalǵan.
Buǵan deıin Reuters Lıan Venfenniń osy ınvestıtsııalyq raýndqa óz qarajatynan shamamen 20 mlrd ıýan (shamamen $2,8 mlrd) salǵanyn habarlady.
Yqtımal ınvestorlar qatarynda qytaılyq tehnologııalyq alpaýyt Tencent pen akkýmýlıator óndirý boıynsha álemdegi eń iri kompanııalardyń biri CATL ataldy. Derekkózderdiń málimetinshe, Tencent shamamen 10 mlrd ıýan, al CATL 5 mlrd ıýan kóleminde ınvestıtsııa salý múmkindigin qarastyrǵan.
DeepSeek V3 jáne R1 modelderin tanystyrǵannan keıin álemdik tehnologııa naryǵynyń nazaryn aýdardy. Bul modelderdiń múmkindikteri Kremnıı alqabynda joǵary baǵalanyp, Qytaı men AQSh arasyndaǵy jasandy ıntellekt salasyndaǵy básekeni kúsheıtti.
Eske sala keteıik, 2025 jyldyń qańtarynda DeepSeek startapynyń jańa ázirlemesiniń iske qosylýy álemdik jasandy ıntellekt naryǵynda úlken rezonans týdyrǵan edi. Qosymsha iske qosylǵannan keıin birneshe saǵat ishinde App Store dúkenindegi tegin qosymshalar reıtınginiń kóshbassharyna aınalyp, amerıkalyq tehnologııalyq kompanııalardyń aktsııalarynyń quldyraýyna áser etti.
Sondaı-aq qytaılyq telekom-operatorlar óz qyzmetterine DeepSeek JI modelin biriktirgenin jazdyq.
Buǵan qosa DeepSeek JI-diń jańa tájirıbelik úlgisin tanystyrdy.
