De Lacure tóńiregindegi daý: Almaty polıtsııasy tergeý nátıjesin jarııalady
ALMATY. KAZINFORM – Qoǵamda rezonans týdyrǵan qazaqstandyq reperdiń málimdemesinen keıin Almaty polıtsııasy tekserý júrgizdi.
Tergeýge onyń oıyn-saýyq baǵdarlamada aıtqan áńgimesi sebep boldy. Bul shyǵarylymy efırge shyqpaǵan. Alaıda túsirilimge qatysqandardyń aıtýynsha, De Lacure sahnalyq esimimen tanymal reper Ánýar Baımuhaev áıel adamǵa jasalǵan zorlyq-zombylyq týraly baıandaǵan. Osydan keıin jurtshylyq mýzykant pen onyń dostarynyń is-áreketine quqyqtyq baǵa berýdi talap etti.
Keıin reper bul jaǵdaıǵa qatysty túsinikteme berip, bul oqıǵada onyń tarapynan da, dosynyń tarapynan da eshqandaı zorlyq-zombylyq áreketteri bolmaǵanyn málimdedi.
Áleýmettik jelidegi narazylyqtan keıin Medeý aýdandyq polıtsııa basqarmasynyń qyzmetkerleri tekserý júrgizdi. Túsinikteme berý úshin ol polıtsııa basqarmasyna shaqyrtyldy.
– Tekserý barysynda ol ózi baıandaǵan oqıǵanyń áleýmettik jelilerde burmalanyp jetkenin, al zorlyq-zombylyq faktileri múldem bolmaǵanyn aıtty. Qazirgi ýaqytta qylmystyq quqyq buzýshylyq deregin rastaıtyn obektıvti málimetter anyqtalǵan joq, - dep habarlady departamentten.
Qazir Ánýar Baımuhaevqa qatysty tekserý aıaqtaldy. Almaty polıtsııasy azamattardy jalǵan aqparat taratýdan aýlaq bolýǵa shaqyrdy.
Eske salaıyq, buǵan deıin Almatyda qaýipti drıft jasaǵan júrgizýshiler ustaldy.
