De la Hoııa: Úshinshi jekpe-jektiń bolatyn-bolmaıtynyn Alvares sheshedi

ASTANA. QazAqparat - Golden Boy Promotions prezıdenti Oskar De la Hoııa Boxingscene portalyna suhbat berip, orta salmaqtaǵy WBC jáne WBA tujyrymy boıynsha álem chempıony, meksıkalyq Saýl Alvarestiń (50-1-2,34KO) qazaqstandyq boksshy Gennadıı Golovkınmen (38-1-1,34KO) bolýy múmkin úshinshi jekpe-jegi týraly aıtty, dep habarlaıdy QazAqparat tilshisi.

«Biz úshinshi jekpe-jekti uıymdastyrý jaǵyn oılastyramyz. Men jańa ǵana Lefflermen (Golovkınniń promoýteri - avt.) jáne Sýleımanmen (WBC prezıdenti) sóılestim, biz Alvarestyń kelesi josparyn talqyladyq. Biz Alvares jáne boks sporty úshin tıimdi jumystar isteımiz, basqasy mańyzdy emes. Eń mańyzdysy - jankúıerler eń tartysty jekpe-jekti kórýi kerek», - dedi De la Hoııa.

Promoýter Alvarestiń osy jyly 15 jeltoqsanynda rıngke oralatynyn, qarsylastyń ázirge belgisiz ekenin jetkizdi.

Sondaı-aq, Oskar De la Hoııa úshinshi jekpe-jek týraly bylaı dedi:

«Ekinshi jekpe-jek óte tartysty boldy. Al úshinshi jekpe-jek bolýy ábden mumkin, jankúıerler bul aıqasty kórgisi keledi. Bastysy - Alvares jeńiske jetti, men endi onymen sóılesemin. Jalpy, úshinshi jekpe-jektiń bolý-bolmaýyn Alvares sheshedi». 

Eske sala keteıik, Golovkın - «Kanelo» rematchy 16 qyrkúıek kúni Amerıka Qurama Shtattarynyń Las Vegas qalasyndaǵy T-Mobile Arena-da ótti. Nátıjesinde, otandasymyz tóreshiler sheshimimen (113-115, 114-114, 113-115) jeńilip, chempıondyq belbeýlerinen aıryldy.