De La Hoııa: Eger Hopkıns Kovalevti jeńse, kelesi aıqasyn Golovkınmen ótkizbek oıy bar
ASTANA. QazAqparat - IBF jáne WBA (Super) nusqalary boıynsha jartylaı aýyr salmaqtaǵy álem chempıony Bernard Hopkıns 32 jastaǵy qazaqstandyq Gennadıı Golovkınmen kezdeskisi keledi.
Osy demalys kúnderi Hopkıns Atlantık-Sıtı qalasynda (AQSh, Nıý-Djersı shtaty) WBO nusqasy boıynsha osy salmaqtaǵy álem chempıony, 31 jastaǵy reseılik Sergeı Kovalevpen jekpe-jekke shyǵady. Golden Boy basshysy Oskar De La Hoııanyń aıtýynsha, aldaǵy jyldyń qańtar aıynda 50 jasqa tolatyn Hopkıns Golovkınmen baǵyn synap kórýge nıetti.
«Eger Hopkıns Kovalevti jeńse, kelesi kezdesýin Golovkınmen ótkizgisi keledi. Biz osyny júzege asyrýǵa tyrysamyz», - degen De La Hoııanyń sózderin keltiredi Sports.yahoo.com.
Artynsha sholýshy Kevın Aıolı Golovkınniń promoýteri Tom Lefflerden túsinikteme surady.
«Men qyzyqty aıqas bolady dep oılaımyn. Aldaǵy jyldyń eń úlken jekpe-jeginiń biri bolady, biraq kóptegen jaıttardy kelisý qajet. Gennadıı úshin 168 fýnttan joǵary aıqasý múmkin dep oılamaımyn», - dep málimdedi Leffler.
Alaıda Golovkınniń jattyqtyrýshysy Abel Sanchestiń pikiri basqasha. Onyń aıtýynsha, búkil sporttyq jolyn orta salmaqta (160 fýnt; 72,6 keli) ótkizgen Golovkın birden eki sanat joǵary - jartylaı aýyr salmaqqa (175 fýnt; 79,4 keli) kóterile alady.
«Men ony Gennadıı úshin jaqsy aıqas bolady dep oılaımyn. Biz aralyq salmaq - 169 nemese 170 fýnt týraly keliskimiz keledi, biraq jartylaı aýyr salmaqta shyǵý kerek bolsa, odan bas tartpaımyz. Menen jattyqtyrýshy retinde: «olaı jasaý múmkin be?» jáne «Bul aıqas saǵan unaı ma?» dep surasa, men eki suraqqa da «ıá» dep jaýap beremin», - dedi Sanches.
