DDU: janýarlar arasynda SARS-CoV-2 taralýy jańa shtamnyń paıda bolý qaýpin týdyrady

JENEVA.QazAqparat - SARS-CoV-2 vırýsynyń janýarlar arasynda taralýy adamdarǵa qaýip tóndiretin jańa koronavırýs shtamynyń paıda bolýyna yqpal etýi múmkin. Sondyqtan álem elderi bul ınfektsııanyń adamnan janýarǵa juǵý qaýpin azaıtýǵa kúsh salýy kerek. Bul týraly QazAqparat Dúnıejúzilik densaýlyq saqtaý uıymyna silteme jasap habarlaıdy.

Dúnıejúzilik densaýlyq saqtaý uıymy, Birikken Ulttar Uıymynyń Azyq-túlik jáne aýyl sharýashylyǵy uıymy jáne Dúnıejúzilik janýarlar densaýlyǵy uıymy dúısenbi kúni álem qaýymdastyǵyna osyndaı úndeý joldady.

Jenevada jarııalanǵan birlesken málimdemede olar jańa koronavırýs nusqasynyń paıda bolý múmkindigin azaıtý jáne odan qorǵaný úshin tıisti sharalar qabyldaýǵa shaqyrdy.

Úsh uıym da «SARS-CoV-2-niń tabıǵatta taralýy janýarlar arasynda jańa koronavırýstyń paıda bolýyna ákelýi múmkin» dep eskertti. Olar qolda bar aqparatqa sáıkes, AQSh-taǵy aqquıryqty buǵylardyń úshten biri SARS-CoV-2 juqtyrǵanyn eske saldy. Buǵan adamdar kináli bolyp otyr.