DDU Venesýelada juqpaly aýrýlardyń órshý qaýpi týraly eskertti
ASTANA. KAZINFORM – Venesýelada joıqyn jer silkinisinen keıin juqpaly aýrýlardyń taralý qaýpi kúsheıdi. Bul týraly BUU-daǵy brıfıngte Panamerıkalyq densaýlyq saqtaý uıymy tótenshe jaǵdaılar jónindegi departamentiniń dırektory Sıro Ýgarte málimdedi, dep habarlaıdy Kazinform.
Onyń aıtýynsha, ýaqytsha ornalastyrý oryndarynda turyp jatqan turǵyndar arasynda qyzylsha, kókjótel sekildi vaktsına arqyly aldyn alýǵa bolatyn aýrýlardyń taralý qaýpi artqan.
Sondaı-aq masa arqyly taralatyn denge qyzbasy, las sý arqyly juǵatyn ishek ınfektsııalarynyń taralý qaýpi de joǵarylap otyr.
Osyǵan baılanysty Dúnıejúzilik densaýlyq saqtaý uıymy halyq tyǵyz ornalasqan ýaqytsha panalaý oryndarynda jappaı vaktsınatsııa júrgizýge sheshim qabyldady. Al Panamerıkalyq densaýlyq saqtaý uıymy Venesýelaǵa 6,2 tonna dári-dármek jetkizip, eki dala gospıtalin ornalastyrdy.
Alaıda Sıro Ýgarteniń aıtýynsha, bul sharalar jetkiliksiz. Qazirgi basty mindet – indetterdiń aldyn alý, aýyzsý júıesin qalpyna keltirý jáne shuǵyl ımmýndaý jumystaryn júrgizý.
Sońǵy málimet boıynsha, 3 shilde tańyndaǵy jaǵdaımen Venesýelada jer silkinisinen qaza tapqandar sany 2595 adamǵa jetti.
Aıta keteıik, 24 maýsymda Venesýelanyń soltústiginde 39 sekýnd aralyqpen magnıtýdasy 7,2 jáne 7,5 bolatyn eki kúshti jer silkinisi tirkelip, artynsha ondaǵan aftershok boldy. 1 shildede elde jer silkinisi qurbandaryn eske alýǵa baılanysty jeti kúndik ulttyq aza tutý jarııalandy.
