DDU Túrkııa men Sırııanyń densaýlyq saqtaý salasyna $84,5 mln bólýge úndedi

JENEVA. ANADOLY - QazAqparat – Dúnıejúzilik densaýlyq saqtaý uıymy álemdik qaýymdastyqty zilzaladan zardap shekken Túrkııa men Sırııanyń densaýlyq saqtaý salasyn qoldaý úshin 84,5 mln dollar bólýge shaqyrdy, dep habarlaıdy QazAqparat tilshisi Anadoly agenttigine silteme jasap.

«Dúnıejúzilik densaýlyq saqtaý uıymy Túrkııa men Sırııadaǵy jer silkinisinen keıin densaýlyq saqtaý salasyndaǵy qajettilikterge shuǵyl negizde 84,5 mln dollar bólýge shaqyrady», - delingen uıym taratqan habarlamada.

Málim bolǵandaı, bul qarajat atalǵan elderge jiberiletin dári-dármek pen medıtsınalyq qural-jabdyqtardy satyp alýǵa baǵyttalady.

Eske salaıyq, 6 aqpanda Kahramanmarashta magnıtýdasy 7 baldan asatyn eki jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.

Prezıdent Rejep Taıyp Erdoǵan tabıǵı apat qurbandaryna baılanysty Túrkııada jeti kúndik ulttyq aza tutý jarııalady.

Sońǵy derekter boıynsha zilzala qurbandarynyń sany 39,6 myńnan asty.