DDU tek naýqastar men dárigerlerge ǵana betperde taǵýǵa keńes beredi - manıpýlıatsııa

NUR-SULTAN. QazAqparat - Qaznet qoldanýshylary DDU-nyń betperde taǵýǵa qatysty usynysyn taratýda. Onda, qoǵamdyq oryndarda tek dárigerler men COVID-19 juqtyrǵandarǵa ǵana medıtsınalyq maska taǵýǵa keńes berilgen. Bul málimdeme pandemııa bastalǵanǵa deıin jasalǵan. Bul týraly QazAqparat stopfake.kz saıtyna silteme jasap habarlaıdy.

Taratylǵan habarlamaǵa «RIA Novostı» jańalyqtar portalynyń skrınshotynan bastalatyn beınerolık tirkelgen. Maqala ótken jyly 29 aqpanynda jarııalanǵan, ıaǵnı COVID-19 pandemııasy bastalǵanǵa deıin. esterińizge sala keteıik, DDSU-nyń Bas dırektory Tedros Gıbreıesýs aýrýdyń 2020 jyldyń 11 naýryzynda ǵana álemdik deńgeıge kóterilgenin málimdedi.

Osydan keıin DDU-nyń maska taǵý týraly usynystary ózgerdi. Qazir mamandar kásip túrine jáne densaýlyq jaǵdaıyna qaramastan, barlyǵyna qoǵamdyq oryndarda betperde taǵyp júrýge keńes beredi.
Sondaı-aq, vıdeoda maskalar vırýs juqtyrýdan qorǵaı almaıdy, óıtkeni olardyń tesikteri tym úlken jáne vırýsty ustaı almaıdy delingen. Bul manıpýlıatsııa. Vırýstar ózdiginen emes, silekeı men dem shyǵaratyn bý tamshylarymen birge aýa arqyly taralady. Osyny eskersek, maskalar aýrýdyń taralýyn shekteı alady. Bul týraly biz jazǵan bolatynbyz.

Sonymen qatar rolıkte AQSh-tyń Aýrýlardy baqylaý jáne aldyn alý jónindegi ortalyǵy – CDC júrgizgen zertteý derekteri keltirilgen. Olarǵa sáıkes, COVID-19 juqtyrǵandardyń 85% betperde taǵyp júrgen. Alaıda, byltyr qazan aıynda Reuters bul aqparatty joqqa shyǵaryp, ony Jeli qoldanýshylary durys túsindirmegen jáne covid-dıssıdentter muny óz pikirleriniń durystyǵyn «dáleldeý» úshin paıdalanǵan dep málimdedi.
Birinshiden, esepte únemi betperdemen júrgen qatysýshylardyń 42%-y jaqyn adamdarynan juqtyrǵan, olarmen qarym-qatynas kezinde olarda betperde bolmaǵany aıtylǵan. Zertteýge qatysqan 107 adam meıramhanalarda túski as ishkenin, taǵy 21 adam barlar men kofehanalarǵa barǵanyn, onda tamaqtaný kezinde maskany sheship otyrǵandaryn aıtqan.
Budan basqa, zertteýde qatysýshylar aýrýdy maskamen júrgende juqtyrǵany týraly rastalǵan derekter joq.
Demek, usynylǵan derekter maska taǵýdyń tıimsiz ekenin dáleldemeıdi.
Odan ári qaraı, beınede maska taǵý ottegi jetispeýshiligine, bakterııalyq ınfektsııalarǵa, bettiń bórtip ketýine jáne psıhologııalyq problemalarǵa ákelýi múmkin degen mıfter keltirilgen. Munyń bárin biz joqqa shyǵarǵan bolatynbyz.

Osylaısha, beınede aıtylǵan tujyrymdardyń birde-bireýi durys emes. Onda keltirilgen málimetter ótirik jáne derektermen manıpýlıatsııalaý bolyp tabylady. Maska taǵý COVID-19 ǵana emes, sondaı-a, aýa-tamshy joldarymen taralatyn basqa da aýrýlardy juqtyrýdyń aldyn alýdyń tıimdi sharasy.