DDU tátti sýsyndar men alkogolge salyqty kóbeıtýge shaqyrdy
ASTANA. KAZINFORM – Dúnıejúzilik densaýlyq saqtaý uıymy elderdiń úkimetterin quramynda qanty bar sýsyndar men alkogolge salyqty aıtarlyqtaı kóbeıtýdi usyndy. Bul týraly uıymnyń eki jańa jahandyq baıandamasynda aıtylǵan, dep habarlaıdy Kabar.
Uıym mamandarynyń aıtýynsha, zııandy ónimderge salynatyn salyqtyń tómen bolýy olardy halyq úshin arzan ári qoljetimdi etip otyr. Al arzan ý – eń qaýipti ý. Sonyń saldarynan semizdik, qant dıabeti, júrek-qan tamyrlary men onkologııalyq aýrýlar kóbeıip, ásirese balalar men jastar arasynda jaraqattaný derekteri artyp barady. Munyń bári densaýlyq saqtaý júıesine salmaq túsirip otyr.
DDU Bas dırektory Tedros Adhanom Gebreıesýstyń sózinshe, adam densaýlyǵyna zııandy ónimderge salynatyn salyq – aýrýdyń aldyn alýdaǵy eń pármendi tetikterdiń biri. Bul bir jaǵynan halyqty saqtandyrsa, ekinshi jaǵynan medıtsınalyq qyzmetterdi qarjylandyrý úshin memlekettik qazynany toltyrýǵa múmkindik beredi.
Uıym keltirgen derekterge súıensek, búginde qant qosylǵan sýsyndarǵa aktsız salyǵy 116 elde bar. Alaıda tátti sýsyndardyń edáýir bóligi áli de salyqtan tys qalyp otyr. Al alkogol ónimderine aktsız kem degende 167 memlekette engizilgenimen, olardyń kópshiliginde salyq mólsheri ýaqyt talabyna saı qaıta qaralmaıdy. Sonyń saldarynan alkogol halyq úshin áli de arzan ári qoljetimdi kúıinde qalyp otyr.
DDU ókilderi alkogol men tátti sýsyndarǵa salyqty arttyrý bastamasyn halyqtyń basym bóligi qoldaıtynyn atap ótedi. Bul qadam zııandy ónimderdi tutynýdy azaıtyp qana qoımaı, memlekettik kiristi de arttyrýǵa múmkindik beredi. Qysqasy, másele tańdaý aldynda tur: arzan tátti men jeńil mas bolý ma, álde ult densaýlyǵyn qorǵaý ma?
Osyǵan deıin DDU qant dıabetimen aýyratyndar sany otyz jylda tórt eseden astam óskeni týraly habarllaǵan edi.