DDU Sýdandy asharshylyq jaılaǵanyn aıtyp, dabyl qaqty

ASTANA. KAZINFORM – Dúnıejúzilik densaýlyq saqtaý uıymynyń (DDU) Bas dırektory Tedros Adhanom Gebreıesýs Sýdandy qaqtyǵys saldarynan asharshylyq jaılap, endi onyń órshı túsýi múmkin ekenin aıtty. Bul týraly DDU basshysy H áleýmettik jelisinde jazdy, dep habarlaıdy Anadoly.

Ol BUU janyndaǵy Azyq-túlik qaýipsizdiginiń yqpaldastyrylǵan klasıfıkatsııasynyń sońǵy esebine sáıkes, Sýdan men Ońtústik Sýdandaǵy jáne Kongo demokratııalyq respýblıkasyndaǵy 50 mıllıonǵa jýyq adam ashtyqtan kóz ashpaı otyrǵanyn jáne otbasylaryn nemen asyrarlaryn bilmeı otyrǵanyn jetkizdi.

Gebreısýstyń sózinshe, áli júrip jatqan qaqtyǵystar, turǵyndardyń údere kóshýi, ekonomıkalyq turaqsyzdyq pen klımattyń ózgerýi azyq-túlik qaýipsizdigi jaǵdaıyn qıyndatyp otyr.

-Sýdannyń keıbir aýdandarynda (El-Fashır men Kadýglı) ashtyq júrip jatqany rastaldy. Ashtyqtyń Ońtústik Sýdandy qosa alǵanda eldiń ózge aımaqtaryna taraý yqtımaldylyǵy joǵary. Ashtyq – biz kesh qaldyq degendi bildiredi. Adamdar ólip jatyr,-dedi DDU basshysy.

Gebreısýs Sýdanǵa azyq-túlikpen kómek berýge shaqyryp, DDU-nyń seriktesteriniń qoldaýymen medıtsınalyq kómekti qajet etkenderdiń barlyǵyna qol ushyn sozýǵa tyrysyp jatqanyn jetkizdi.

-Ýaqytta ótkizip almý kerek, árıne. Alaıda gýmanıtarlyq kómeksiz bizdiń múmkindikterimiz shekteýli,-dedi ol.

Osyǵan deıin BUU Sýdandaǵy gýmanıtarlyq daǵdarystyń ýshyǵyp bara jatqanyn eskertken bolatyn.