DDU shekaradan ótken kezde COVID-19 vaktsınatsııasyn talap etý mindetti emes dep sanaıdy
JENEVA. QazAqparat - Dúnıejúzilik densaýlyq saqtaý uıymy (DSU) dırektory shaqyrǵan Tótenshe jaǵdaılar komıteti shekaradan ótken kezde COVID-19 vaktsınatsııasy týraly sertıfıkatty talap etý mindetti emes ekendigin málim etti. Sebebi vaktsınalar barlyǵyna birdeı qoljetimsiz jáne olardyń ınfektsııanyń taralýyn boldyrmaýdaǵy tıimdiligi dáleldenbegen. Onyń tek aýrýdyń asqynýynan qorǵaıtyndyǵy belgili, dep habarlaıdy QazAqparat BUU jańalyqtar ortalyǵyna silteme jasap.
Komıtet sonymen qatar koronavırýstyń jańa shtammyna qatysty usynystar jasady: sarapshylar elderdiń vırýstyń genomdaryn retke keltirý salasyndaǵy múmkindikterin keńeıtýge, ıaǵnı mýtatsııany anyqtaýǵa jol ashatyn protsedýra, sondaı-aq túrli elderdiń ǵalymdary arasynda belsendi aqparat almasýdy jolǵa qoıý.
DDU-da buryn habarlanǵandaı, vaktsınalar Covid-19-tyń asqynýynan qorǵaıdy, biraq vaktsına alǵan adamnyń múldem juqtyrmaıtyndyǵy jáne aýrýdy basqalarǵa juqtyrmaıtyndyǵy áli dáleldengen joq. Ǵalymdardyń qolynda bar málimetter óte shekteýli. Sondyqtan komıtet músheleri shekaradan ótken kezde «vaktsınatsııa týraly tólqujat» talap etý qajet emes deıdi.
«Bizde bul daýyldan aman qalýdyń bir joly bar: biz qolymyzdaǵy qarajatty bir-birimizben bólisýimiz kerek jáne olardy birge paıdalaný mindettemesin ustanýymyz qajet», - dedi DDU bas dırektory Tedros Gebreııýs brıfıngte sóılegen sózinde.
