DDU sarapshylary «Densaýlyq» jańa memlekettik baǵdarlamasynyń jobasyna óte jaqsy baǵa berdi

ASTANA. QazAqparat - QR Densaýlyq saqtaý jáne áleýmettik damý mınıstri Tamara Dúısenovamen bolǵan kezdesýde DDU-nyń Eýropalyq aımaqtyq bıýrosynyń aımaqtyq dırektorynyń arnaıy ókili, juqpaly aýrýlar bólimi jetekshisiniń orynbasary Nedret Emıroglý hanym QR DSÁDM 2016-2020 jyldarǵa arnalǵan densaýlyq saqtaý salasyn damytýdyń «Densaýlyq» memlekettik baǵdarlamasyna óte jaqsy baǵa berdi.

Bul týraly QR DSÁDM baspasóz qyzmeti habarlady. «Biz Qazaqstan Respýblıkasynyń 2016-2020 jyldarǵa arnalǵan densaýlyq saqtaý salasyn damytýdyń memlekettik baǵdarlamasymen tanystyq. Bul óte jaqsy strategııalyq baǵdarlama. Ol tolyǵymen Dúnıejúzilik densaýlyq saqtaý uıymynyń saıasatyna saı daıyndalǵan. Atalmysh baǵdarlama Qazaqstandaǵy densaýlyq saqtaý salasynyń sapaly ári serpindi damýyna yqpal etedi», - dedi N.Emıroglý.