DDU: Ólimge ákeletin hantavırýstyń taralýy 2 shildede aıaqtalýy múmkin
ASTANA. KAZINFORM — Dúnıejúzilik densaýlyq saqtaý uıymy (DDU) ótken aıda álemdik BAQ nazaryn aýdarǵan hantavırýs indeti resmı túrde 2 shildede aıaqtalýy múmkin ekenin málimdedi, dep habarlaıdy Euronews.
Sársenbi kúni Jenevada ótken baspasóz máslıhatynda DDU bas dırektory Tedros Adhanom Gebreıesýs hantavırýs juqtyrǵandardyń rastalǵan sany 13 adam bolyp otyrǵanyn, olardyń úsheýi qaıtys bolǵanyn habarlady.
Іndet týraly DDU-ǵa 2 mamyrda habarlanǵannan beri 33 el men aýmaqta 650-den astam baılanysta bolǵan adam anyqtalǵan.
— Baılanysta bolǵandardyń 54 adamynan basqasynyń bári karantın merzimin aıaqtady. Qalǵandary bul kezeńdi 2 shildege deıin támamdaıdy, — dedi uıym basshysy.
Onyń aıtýynsha, eger osy ýaqytqa deıin jańa jaǵdaılar tirkelmese, DDU indettiń aıaqtalǵanyn jarııalaıdy.
Hantavırýsqa baılanysty alańdaýshylyq Nıderland týy astynda júzgen MV Hondius krýızdik kemesiniń jolaýshylary arasynda aýyr respıratorlyq aýrýlar anyqtalǵannan keıin kúsheıdi.
Keme 1 sáýirde Argentınanyń Ýshýaııa qalasynan shyǵyp, Ońtústik Atlantıkadaǵy birneshe núktege, sonyń ishinde Ońtústik Georgııa araly, Trıstan-da-Kýnıa, Áýlıe Elena araly jáne Voznesenıe aralyna baǵyt alǵan.
Jolaýshylardyń biri aýyryp, 11 sáýirde kóz jumǵan. Onyń denesi Áýlıe Elena aralynda túsirilgen. Keıin sol aralǵa túsken bir áıel jolaýshy 26 sáýirde Ońtústik Afrıkaǵa jetken soń qaıtys boldy. Taǵy bir jolaýshy 2 mamyrda kóz jumdy.
Osydan keıin kemedegi qalǵan jolaýshylar Tenerıfe aralyna evakýatsııalandy.
DDU indettiń shyǵý sebepteri men taralý joldaryn anyqtaý úshin jergilikti bılik organdarymen birlesken jumysty jalǵastyratynyn málimdedi.
— Biz vırýs úlgisin Shveıtsarııadaǵy DDU-nyń BioHub bıobankine jetkizý baǵytynda jumys istep jatyrmyz. Bul bolashaqta dıagnostıka, emdeý ádisteri men vaktsınalar ázirleý úshin mańyzdy bolady, — dedi Tedros Adhanom Gebreıesýs.
Hantavırýstar — tasymaldaýshysy kemirgishter sanalatyn vırýstar toby. Olar kóbine adamdarǵa juqtyrǵan kemirgishtermen nemese olardyń zárimen, nájisimen jáne silekeıimen baılanys kezinde beriledi. Bul vırýstar aýyr ári keı jaǵdaıda ólimge ákeletin aýrýlardy týdyrýy múmkin.
AQSh-tyń Aýrýlardy baqylaý jáne aldyn alý ortalyqtary málimetinshe, MV Hondius kemesinde vırýs áserine ushyraýy múmkin barlyq amerıkalyq azamattar 21 maýsymda 42 kúndik baqylaý merzimin aıaqtaǵan.
— Osy indetke baılanysty AQSh aýmaǵynda hantavırýs juqtyrýdyń birde-bir jaǵdaıy tirkelgen joq, — dep habarlady CDC.
Buǵan deıin Nıderlandydaǵy emhana qyzmetkerinen hantavırýs anyqtalǵany aıtyldy.
