DDU ókili koronavırýstyń jańa tolqyny týraly eskertti
NUR-SULTAN. QazAqparat - Dúnıejúzilik densaýlyq saqtaý uıymynyń Eýropalyq bıýrosynyń basshysy Hans Klıýge koronavırýstyń omıkron shtammynyń kishi nusqalarynan týyndaǵan COVID-19-dyń jańa tolqyny týraly habarlady. Ol Eýropa elderin vaktsınatsııa men betperde taǵýǵa qatysty jedel sharalar qabyldaýǵa shaqyrdy, dep habarlaıdy QazAqparat COVID-19 taralýyna jol bermeý jónindegi vedomstvoaralyq komıssııaǵa silteme jasap.
Onyń aıtýynsha, sońǵy alty aptada Eýropa óńirinde koronavırýs ınfektsııasyn juqtyrýdyń jańa jaǵdaılarynyń sany úsh ese ósti, al ótken aptada 3 mıllıonǵa jýyq jańa jaǵdaı tirkeldi, bul álemdegi barlyq jańa ınfektsııalardyń jartysyna jýyǵyn quraıdy. Klıýge sýyq aýa raıy jaqyndaǵan saıyn COVID qarqyndy taralatyndyǵyna da alańdaýshylyq bildirdi.
«Búgin DDU-nyń Eýropalyq aımaqtyq bıýrosy ınfektsııanyń aldaǵy tolqyndaryna daıyndalýǵa kómektesý úshin koronavırýs jáne basqa da tynys alý vırýstarymen kúresýdiń kúzgi-qysqy strategııasyn jarııalady. Áreket etý úshin kúzdiń kelýin kútsek, tym kesh bolady», - dedi bıýro dırektory.
Strategııa, atap aıtqanda, halyqty vaktsınatsııamen qamtýdy ulǵaıtýdy, úı-jaılarda jáne qoǵamdyq kólikte betperde taǵýǵa yntalandyrýdy, jabyq úı-jaılardyń jeldetilýin kúsheıtýdi kózdeıdi.
