DDU Nıpa vırýsynyń taralý qaýpin baǵalady

ASTANA. KAZINFORM — Dúnıejúzilik densaýlyq saqtaý uıymy juma kúni Úndistanda tirkelgen Nıpah vırýsynyń taralý qaýpi tómen ekenin málimdedi, dep habarlaıdy Azertadj. 

Sondaı-aq uıym sapar men saýdaǵa shekteý engizýdi usynbaıtynyn aıtty. Úndistanda ınfektsııanyń eki jaǵdaıy tirkeldi.

Gonkong, Malaızııa, Sıngapýr, Taıland jáne Vetnam osy aptada indettiń taralýyna jol bermeý maqsatynda áýejaılardaǵy tekserý sharalaryn kúsheıtken Azııa elderiniń qataryna kirdi.

— DDU bul eki jaǵdaıdan keıin ınfektsııanyń odan ári taralý qaýpin tómen dep baǵalaıdy, — dep habarlady Reuters agenttigi juma kúni elektrondy hatynda.

Sondaı-aq uıym Úndistannyń mundaı indet oshaqtaryn tejeý múmkindigi bar ekenin atap ótti.

— Qazirgi tańda vırýstyń adamnan adamǵa berilýi artqanyn dáleldeıtin derekter joq, — delingen málimdemede.

Sonymen qatar vedomstvo Úndistannyń densaýlyq saqtaý organdarymen óz áreketterin úılestirip otyrǵanyn habarlady.

Degenmen, bul Úndistannyń keıbir bólikterinde jáne kórshiles Bangladeshte jarqanattar popýlıatsııasy arasynda taralatyn vırýstyń odan ári juqtyrýyn joqqa shyǵarmaıdy

Jarqanat pen shoshqa arqyly taralatyn bul vırýs adamda qyzý kóterilip, mı qabynýyn týyndatýy múmkin. Odan bolatyn ólim-jitim deńgeıi 40 paıyzdan 75 paıyzǵa deıin jetedi. Qazirgi tańda oǵan qarsy dári joq, al ázirlenip jatqan vaktsınalar áli de synaq kezeńinen ótýde.

Vırýs adamǵa juqtyrǵan jarqanattardan nemese olar jýylmaǵan jemister arqyly beriledi.

Ol adamnan adamǵa juǵýy qıyn, sebebi ádette juqtyrý úshin ınfıtsırlengen adammen uzaq ýaqyt boıy tyǵyz baılanys qajet.

Shaǵyn indet oshaqtary sırek qubylys emes, al vırýsologtar jalpy halyq úshin qaýip deńgeıi tómen kúıinde qalyp otyrǵanyn aıtady.

DDU málimetinshe, ınfektsııanyń naqty kózi áli tolyq zerttelmegen.

Aıta ketelik birneshe el Nıpah vırýsyna baılanysty shekaralyq qaýipsizdik sharalaryn kúsheıtken edi.