DDU mıssııasy Qazaqstandaǵy dárilerdiń aınalymyn baqylaý júıesin baǵalamaq

ASTANA. KAZINFORM — Astanada Dúnıejúzilik densaýlyq saqtaý uıymy (DDU) sarapshylarynyń Qazaqstandaǵy dárilik zattardyń aınalymyn retteýdiń ulttyq júıesin baǵalaý jónindegi qorytyndy mıssııasy bastaldy, dep habarlaıdy Densaýlyq saqtaý mınıstrliginiń baspasóz qyzmeti.

— Qorytyndy sapar Global Benchmarking Tool (GBT) jahandyq salystyrmaly baǵalaý quraly sheńberinde ótýde jáne eldiń retteýshi júıesiniń jetilý deńgeıin aıqyndaýda sheshýshi kezeń bolmaq. Mıssııa qorytyndysy boıynsha Qazaqstanǵa jetilýdiń úshinshi deńgeıin berý múmkindigi týraly sheshim qabyldanady. Bul mártebe ulttyq retteýshi tetikterdiń halyqaralyq standarttarǵa sáıkestigin jáne olardyń ınstıtýtsıonaldyq turaqtylyǵyn rastaıdy. Qazirgi ýaqytta Qazaqstan jetilýdiń ekinshi deńgeıinde, — dep túsindirdi mınıstrlik.

GBT júıesi baǵalaýdyń tórt deńgeıin qarastyrady. DDU derekterine sáıkes, úshinshi jáne tórtinshi deńgeılerge nebári 36 memleket qol jetkizgen, olardyń qatarynda AQSh, Kanada, Ulybrıtanııa, Japonııa jáne Eýropalyq odaq elderiniń basym bóligi bar.

Vedomstvo atap ótkendeı, úshinshi deńgeıge ótý farmatsevtıkalyq retteýdi júıeli jańǵyrtýdyń, qadaǵalaý fýnktsııalaryn kúsheıtýdiń, rásimderdiń ashyqtyǵyn arttyrýdyń jáne dárilik zattardyń sapasy men qaýipsizdigin qamtamasyz etýdiń jahandyq júıesine ıntegratsııalanýdyń moıyndalýy bolady.

Halyqaralyq benchmarkıngten ótý ulttyq baqylaý júıesine degen senimdi nyǵaıtýdyń, otandyq farmatsevtıkalyq ónimderdiń eksporttyq áleýetin keńeıtýdiń jáne salaǵa ınvestıtsııalar tartýdy odan ári arttyrýdyń strategııalyq qadamy retinde qarastyrylady.

Osyǵan deıin Densaýlyq saqtaý mınıstrligi satyp alý júıesin reformalaýdyń nátıjesinde únemdelgen 70,5 mlrd teńgeni azamattardy qosymsha dárilik qamtamasyz etýge baǵyttaǵany aıtyldy.