DDU koronavırýstyń jańa tolqyny taraýy múmkin ekenin eskertti

ASTANA.QazAqparat - Dúnıejúzilik densaýlyq saqtaý uıymy AQSh pen Eýropada qarqyndy tarap jatqan koronavırýstyń jańa shtamyna alańdaýshylyq tanytty, dep habarlaıdy QazAqparat.

DDU koronavırýstyń Omicron XBB.1.5 shtamy aýrýdyń jańa tolqynyn týdyrýy múmkin dep sanaıdy, dep habarlaıdy Politico.

Bul shtamm qazirdiń ózinde birneshe kontınenttegi 29 elden anyqtalǵan.

«Bizdi onyń ósý qarqyny alańdatady, atap aıtqanda Eýropadaǵy jáne AQSh-tyń soltústik-shyǵysyndaǵy keıbir elderde XBB.1.5 bul derttiń qosalqy túrlerin tez arada basyp ketti», - dedi DDU-nyń Covid -19 boıynsha tehnıkalyq qyzmetkeri Marııa Van Kerhove.

Sonymen qatar, sarapshylar bul vırýs týdyrǵan aýrýdyń aýyrlyǵy týraly birjaqty jaýap bere almaı otyr. Omicron XBB.1.5 vırýstyń basqa nusqalaryna qaraǵanda aýyryraq bolatyny nemese bolmaıtyny belgisiz.

Van Kerhovanyń aıtýynsha, sarapshylardyń boljamynsha jańa shtamm áldeqaıda aýyr bolady. Anyǵy jaqyn kúnderi jarııalanady.

Al Financial Times DDU Qytaıdy koronavırýstan aýrýhanaǵa jatqyzylǵandar men qaıtys bolǵandar sany týraly tolyq aqparat bermeı otyrǵanyn synaǵany týraly jazdy.

Qazaqstanda COVID-19 aýrýynyń ósýi jalǵasýda. 2022 jyldyń jeltoqsan aıynyń sońynda elde koronavırýstyń jarty aıdaǵy alǵashqy ólimi tirkeldi.