DDU koronavırýske qarsy eki preparattyń qoldanysyn toqtatty

JENEVA. QazAqparat – Dúnıejúzilik densaýlyq saqtaý uıymynyń (DDU) basshysy Tedros Adrahom Gebreıesýs Jenevada BAQ úshin uıymdastyrylǵan brıfıng kezinde DDU jańa koronavırýske qarsy preparattar – gıdroksıhlorohın men hlorohındi synaqtan ótkizýdi ýaqytsha toqtatqanyn málimdedi. QazAqparat bul týraly CNN-ge silteme jasap habarlaıdy.

Sheshim juma kúni The Lancet medıtsınalyq jýrnalynda jarııalanǵan observatsııalyq zertteý nátıjeleri boıynsha qabyldanǵan. Zertteý avtorlarynyń aıtýynsha, koronavırýske shaldyǵyp, gıdroksıhlorohın jáne hlorohınmen em alǵan patsıentterdiń arasynda ólim deńgeıi joǵary bolǵan.

Tedros Gebreıesýs synaq júrgizgen táýelsiz atqarýshy top qazirgi kezde barlyq qoljetimdi dálelderdi qarastyryp, zertteý aıaqtalǵansha preparattardy qoldanýdy ýaqytsha toqtatqanyn málim etti. Atqarýshy topqa zertteýge qatysyp otyrǵan 10 el engen.

Zertteýge 35 elden 400-den astam aýrýhananyń patsıentteri qatysýda. Bul – COVID-19 indetine qarsy qaýipsiz ári tıimdi preparattardy izdeý boıynsha jahandyq zertteý jumysy.

DDU basshysy zertteýdiń basqa kezeńderi jalǵastyrylyp otyrǵanyn qosyp ótti. Ol sondaı-aq preparattardyń ekeýin de «aýtoımmýndyq syrqattary bar nemese bezgekpen aýyratyn patsıentterge qoldaný» qaýipsiz ekenin atap ótti.

CNN-niń jazýynsha, buǵan deıin AQSh prezıdenti Donald Tramp dárigermen keńesken soń gıdroksıhlorohındi kúndelikti qabyldap júrgenin málim etken.

Aqúı basshysynyń aıtýynsha, ol koronavırýspen kúres júrgizip otyrǵan medıtsınalyq qyzmetkerlerden preparat týraly óte kóp jaqsy pikir estigen. Tramp koronavırýsqa testti birneshe ret tapsyryp, barlyǵynda da teris kórsetkish boldy.

Prezıdent Tramptyń preparat týraly pikirinen soń, onyń satylymy kúrt artqan.