DDU: Koronavırýs týberkýlezden bolatyn ólimniń ósýine ákelýi yqtımal
JENEVA. QazAqparat. – Dúnıejúzilik densaýlyq saqtaý uıymy taıaý jyldary týberkýlezden bolatyn ólim-jitimniń kúrt ósýi múmkin ekendigin eskertti, dep habarlaıdy QazAqparat tilshisi Ál-Jazıra agenttigine silteme jasap.
Buǵan koronavırýs pandemııasynan týyndaǵan daǵdarystar men qarajattyń jetispeýshiligi sebep bolýy múmkin.
DDU 2020 jyldyń birinshi jartysynda týberkýlezdiń jańa jaǵdaılary týraly esep berý men baqylaýdyń edáýir tómendegenin aıtty, óıtkeni elder COVID-19 taralýyn boldyrmaýǵa shekteýler engizgen bolatyn.
Esepte álemdegi týberkýlez aýrýy eń joǵary elderdiń qataryna kiretin Úndistan, Indonezııa jáne Fılıppın elderi 2020 jyldyń alty aıyndaǵy jaǵdaı týraly habarlamalar ótken jyldyń sáıkes kezeńimen salystyrǵanda 25-30% tómendegeni týraly aıtqan.
DDU modeline sáıkes, aýrý jaǵdaılary týraly habarlamalar sanynyń mundaı azaıýy týberkýlezden qosymsha ólimniń kúrt ósýine ákelýi múmkin. 2018-2019 jyldar aralyǵynda shamamen 14 mıllıon adam týberkýlezden emdelgen, biraq bul 2022 jylǵa deıin emdelýge úmittengen 40 mıllıonnyń úshten biri ǵana.
DDU málimetteri boıynsha, naýqastardyń shamamen 85%-yn alty aı boıy dári-dármekpen sátti emdeýge bolady. Emdeý sonymen qatar ınfektsııanyń odan ári taralýyn azaıtady. 2000 jyldan bastap týberkýlezdi emdeý 60 mıllıonnan astam adamnyń ólimin saqtap qaldy.
Esterińizge sala keteıik, týberkýlez álemdegi eń qaýipti juqpaly aýrý bolyp sanalady. Bul kóbinese ókpege áser etetin jáne ońaı taralýy múmkin bakterııalardan bolady.
