DDU: Kongoda Ebola indeti kúsheıip barady
ASTANA. KAZINFORM — Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetimen kúreske aldaǵy úsh aıda 115 mıllıon AQSh dollary qajet ekenin málimdedi, dep jazady BBC.
Uıymnyń habarlaýynsha, indetke qarsy sharalardy qarjylandyrý ázirge qajetti kólemniń nebári 35 paıyzyn ǵana qurap otyr.
DDU-nyń sársenbi kúngi derekterine sáıkes, Kongo Demokratııalyq Respýblıkasynda Ebola juqtyrýdyń 344 jaǵdaıy rastalyp, 60 adam qaıtys bolǵan.
Kórshiles Ýgandada toǵyz adam vırýs juqtyryp, bir adam qaıtys bolǵan.
Sonymen qatar taǵy bir adam ınfektsııa juqtyrǵan bolýy múmkin degen kúdik bar.
Іndet alǵash tirkelgen Itýrı provıntsııasynda medıtsına qyzmetkerleriniń qaýipsizdigi ózekti máselege aınalyp otyr.
Sońǵy ýaqytta Ebolaǵa qarsy emdeý ortalyqtary men naýqastar jatqan aýrýhanalarǵa birneshe ret shabýyl jasalǵan.
Qarýly qaqtyǵystar men zorlyq-zombylyq áreketteri indetpen kúresti qıyndatyp otyr.
Sonyń saldarynan medıtsına qyzmetkerlerine naýqastarmen baılanysta bolǵan adamdardy anyqtaý, jańa juqtyrý jaǵdaılaryn tirkeý jáne der kezinde kómek kórsetý barǵan saıyn kúrdelene túsken.
DDU mamandary indettiń odan ári taralý qaýpi saqtalyp otyrǵanyn atap ótti.
Osyǵan deıin Kenııada Ebola karantın ortalyǵyn ashýǵa qarsy sherý kezinde eki adam qaza tapqany týraly jazdyq.
