DDU Gonkong tumaýynyń tez taralyp jatqanyn eskertti

ASTANA.KAZINFORM — Dúnıejúzilik densaýlyq saqtaý uıymynyń (DDSU) mamandary A(H3N2) tumaý vırýsynyń, ıaǵnı Gonkong tumaýynyń álemde jyldam taralyp jatqanyn málimdedi, dep jazdy BELTA. 

Qazirgi tańda vırýs 30-dan astam elde tirkelgen. Bul týraly uıymnyń epıdemııalyq jáne pandemııalyq qaterlerdi basqarý departamentindegi jahandyq respıratorlyq qaýipter bóliminiń basshysy Ventsın Chjan habarlady.

Soltústik jartysharda qys mezgiliniń bastalýymen tumaý jáne basqa da tynys joldary vırýstaryna shaldyǵý derekteri kóbeıip otyr. Alaıda mamandardyń aıtýynsha, álemdik deńgeıdegi tumaý juqtyrý kórsetkishi ázirge boljamnan asa qoıǵan joq.

Sonymen birge DDSU A(H3N2) vırýsynyń J.2.4.1 dep atalatyn jańa qosalqy túriniń paıda bolyp, tez taralýyna erekshe nazar aýdaryp otyr.

Ventsın Chjannyń aıtýynsha, bul vırýs alǵash ret tamyz aıynda Aýstralııa men Jańa Zelandııada anyqtalǵan. Keıinnen ol Ońtústik Amerıkadan basqa álemniń barlyq óńirlerindegi 30-dan astam elde tirkelgen.

DDSU ókiliniń málimetinshe, qazirgi epıdemıologııalyq derekter aýrýdyń aýyr ótý jaǵdaılarynyń artqanyn kórsetpeıdi. Alǵashqy zertteýler qoldanystaǵy maýsymdyq tumaýǵa qarsy vaktsınalardyń jańa vırýsqa qarsy tıimdiligin saqtap otyrǵanyn, ıaǵnı aýyr asqynýlardyń aldyn alyp, aýrýhanaǵa jatqyzý qaýpin azaıtatynyn kórsetken.

Sonymen qatar tumaýmen birge respıratorlyq-sıntsıtıaldyq vırýs, koronavırýs jáne rınovırýstar sııaqty basqa da tynys joly ınfektsııalary aınalymda júr.

Osy jaǵdaıǵa baılanysty birqatar elderde densaýlyq saqtaý júıesine qosymsha salmaq túsip otyr. Bul tek tynys joly aýrýlarymen aýrýhanaǵa jatqyzylǵandar sanynyń artýymen ǵana emes, sonymen qatar basqa maýsymdyq vırýstyq ınfektsııalardyń kóbeıýimen de baılanysty.