DDU: Gaza sektoryndaǵy densaýlyq saqtaý júıesi qaıtarymsyz kúıge jetti

ASTANA. KAZINFORM — Dúnıejúzilik densaýlyq saqtaý uıymynyń (DDU) bas dırektory Tedros Adanom Gebreıesýs málimdegendeı, Izraıldiń Gaza sektoryndaǵy shabýyldaryn jalǵastyrýy men kúsheıtýi jáne jańa evakýatsııa talaptary bul aımaqtaǵy densaýlyq saqtaý júıesin daǵdarys sheginen tys jaǵdaıǵa jetkizdi. Bul týraly Anadoly habarlady. 

Gebreıesýs áleýmettik jelidegi málimdemesinde, Izraıldiń qurlyqtaǵy operatsııalary men evakýatsııa talaptarynyń saldarynan Gaza emhanalary jumys isteýge qaýqarsyz kúıge túskenin atap ótti. Evakýatsııa aımaǵyna Indonezııa aýrýhanasy, Kemal Advana, ál-Aýda aýrýhanalary, úsh emhana jáne tórt medıtsınalyq pýnkt kirgen. Taǵy eki aýrýhana, tórt emhana men alty medıtsınalyq pýnkt evakýatsııa aımaǵynan bir shaqyrym radıýsta ornalasqan.

— Kemal Advana aýrýhanasy shabýyldar men dúrbeleń saldarynan jumys istemeı tur, ǵımarat bos qalǵan. Indonezııa aýrýhanasy da qoljetimsiz, onyń mańynan ızraıldik áskerılerdi baıqaǵan. Gazanyń soltústigindegi jalǵyz jumys istep turǵan ál-Aýda aýrýhanasy qaýipsizdik shekteýlerine baılanysty shamadan tys júktememen jumys istep jatyr, jabylyp qalý qaýpi de basym, — dedi ol.

DDU basshysy Eýropalyq aýrýhana men Gazanyń ońtústigindegi basqa da medıtsınalyq mekemeler 19 mamyrda jarııalanǵan evakýatsııa aımaǵyna engenin aıtty. Násir, Shýhada ál-Aqsa aýrýhanalary, bes emhana jáne 17 medıtsınalyq pýnkt sol aımaqtyń bir shaqyrym mańynda ornalasqan.

Onyń aıtýynsha, medıtsınalyq mekemeler tikeleı shabýylǵa ushyramasa da, mańyndaǵy qaqtyǵystar naýqastardyń em alýy men dári-dármek pen jabdyq jetkizýge kedergi keltirýde. 

— Bul aýrýhanalardy tez arada isten shyǵarýy múmkin. Biz mundaı jaǵdaılardy buryn da kórdik. Muny taǵy qaıtalaýǵa bolmaıdy. DDU medıtsınalyq mekemelerdiń shuǵyl qorǵalýyn talap etedi. Aýrýhanalar áskerı nysanǵa aınalmaýy kerek jáne shabýylǵa ushyramaýy tıis. Shuǵyl túrde bitim jasalýy qajet, — dedi Gebreıesýs.

Izraıl Gazany tolyq basyp alý josparyn júzege asyra bastady

Izraıl armııasy 18 naýryzda tańerteń Gazadaǵy jappaı shabýyldaryn qaıta bastady, bul 19 qańtarda kúshine engen bitimgershilikke qaramastan boldy.

Palestına derekterine sáıkes, naýryzda shabýyldar jańartylǵaly 3 427 adam qaza tapty, olardyń kópshiligi — áıelder, balalar men qarttar. Taǵy 9 647 adam jaralandy.

2023 jyldyń 7 qazanynda Izraıldiń Gaza sektoryna shabýyldary bastalǵaly beri qaza tapqandardyń jalpy sany 53 573 adamǵa, jaralanǵandar 121 688 adamǵa jetti.

Izraıl Gazany tolyqtaı basyp alý josparyn júzege asyryp jatyr. Premer-mınıstr Bınıamın Netanıahý «Izraıl Gazany tolyq basyp alady» dep málimdedi.

Bul josparǵa sáıkes, Izraıl áskeri aımaqqa turaqty baqylaý ornatýy tıis, al palestınalyqtar Gazanyń ońtústigindegi t. n. «jınaý lagerlerine» kóshirilip, tek aman qalýǵa jetkilikti gýmanıtarlyq kómekpen qamtamasyz etiledi.

Izraıl mınıstrleri Gazada qalǵannyń bárin joıý jáne palestınalyqtardy aldymen ońtústikke, keıin basqa elderge kúshtep kóshirý nıetterin de jasyrmady.