DDU elimizge dárilik zattardyń aınalymyn retteý salasyn jetildirý boıynsha 3-shi deńgeı berilgenin rastady
ASTANA. KAZINFORM – Prezıdent Qasym-Jomart Toqaev Dúnıejúzilik densaýlyq saqtaý uıymynyń bas dırektory Tedros Adhanom Gebreıesýspen kezdesti, dep habarlaıdy Aqorda.
Áńgimelesý barysynda Qazaqstan men Dúnıejúzilik densaýlyq saqtaý uıymy arasyndaǵy yntymaqtastyqtyń qazirgi jaı-kúıi jáne perspektıvasy talqylandy.
Memleket basshysy Uıymmen yqpaldastyqtyń jańa ári sapaly deńgeıge kóterilgenine toqtalyp, sondaı-aq elimizdiń jahandyq bastamalaryna udaıy qoldaý kórsetip kele jatqany úshin rızashylyǵyn bildirdi.
Kezdesýde klımat pen densaýlyq saqtaý baǵytynda birlesken zertteýler júrgizý, tsıfrlyq transformatsııaǵa arnalǵan bastamalardy ilgeriletý jáne densaýlyq saqtaý salasyna jasandy ıntellektini engizý máseleleri qarastyryldy.
Tedros Adhanom Gebreıesýs Qasym-Jomart Toqaevqa Óńirlik ekologııalyq sammıtke qatysýǵa shaqyrǵany úshin alǵys aıtty.
DDU basshysy Qazaqstanda jańa Konstıtýtsııa qabyldaý arqyly saıası reformalar men ekonomıkalyq órleýdiń tabysty iske asyrylyp jatqanyn atap ótti.
Onyń aıtýynsha, Uıym Qazaqstannyń óńirlik jáne jahandyq deńgeıde ekologııa men sý qaýipsizdigin qamtamasyz etýge baǵyttalǵan kúsh-jigerin qoldaıdy.
Kezdesý sońynda Bas dırektor Memleket basshysyna Uıymnyń elimizge dárilik zattardyń aınalymyn retteý salasyn jetildirý boıynsha 3-shi deńgeı berilgenin rastaıtyn hatty tabystady. Bul ulttyq baqylaý júıesiniń senimdiligin kórsetedi.
Qazaqstan mundaı dárejege TMD elderi arasynda birinshi, al Eýropa aımaǵynda tórtinshi bolyp qol jetkizgen.
Aıta keteıik, Astanada DDU qoldaýymen balalar ál-aýqatyn arttyrýǵa baǵyttalǵan úndeý qabyldandy.
