DDU Ebolanyń jańa shtamyna qarsy «Ervebo» vaktsınasyn synaýdy usyndy
ASTANA. KAZINFORM — DDU-nyń Tehnıkalyq konsýltatıvtik toby Býndıbýdjıo vırýsy qozdyratyn Ebolaǵa qarsy qoldanylýy múmkin vaktsınalarǵa qatysty jańa esebin jarııalady. Bul týraly BUU jańalyqtar qyzmeti habarlady.
Sarapshylar Kongo Demokratııalyq Respýblıkasynda tarap jatqan Ebola indetine baılanysty «Ervebo» vaktsınasyn randomızatsııalanǵan klınıkalyq synaqqa basymdyqpen engizýdi usyndy. «Ervebo» — Ebolaǵa qarsy tirkelgen jalǵyz vaktsına. Qazirgi tańda ol Zaır vırýsynyń shtamyna qarsy qoldanylady.
DDU janyndaǵy konsýltatıvtik toptar 16 mamyrda DR Kongoda Býndıbýdjıo vırýsynan týyndaǵan Ebola indetine baılanysty halyqaralyq mańyzy bar densaýlyq saqtaý salasyndaǵy tótenshe jaǵdaı jarııalanǵannan keıin jumysyn bastady. Sodan beri sarapshylar Ebolanyń osy túrine qarsy qoldanystaǵy vaktsınalar men emdeý tásilderin zerttep, alǵashqy usynymdaryn ázirledi.
Sol kezde «Ervebo» vaktsınasyn muqııat ázirlengen zertteý hattamalarynan tys qoldanbaý usynylǵan edi. Bul vaktsınanyń Býndıbýdjıo vırýsyna qarsy tıimdiligin baǵalaý úshin qajet boldy.
Aldyńǵy aptada konsýltatıvtik top músheleri úshinshi otyrysyn ótkizip, «Erveboǵa» qatysty jańa derekterdi qarady. Sarapshylar janýarlarǵa júrgizilgen zertteýlerdiń aldyn ala nátıjelerin zerttedi. Zertteý barysynda vaktsına janýarlarda Býndıbýdjıo vırýsyna qarsy belgili bir deńgeıde aıqaspaly qorǵanys qalyptastyratyny, atap aıtqanda, aýrýdan qaıtys bolý qaýpin tómendetetini anyqtalǵan.
Top vaktsınanyń qaýipsizdigin, tıimdiligin, qoljetimdiligin jáne qoldaný múmkindikterin baǵalady. Mamandar Býndıbýdjıo vırýsynan týyndaǵan indet kezinde baılanysta bolǵan adamdardy vaktsınatsııalaý úshin «Ervebony» qoldaný qaýipsiz degen qorytyndyǵa keldi. Osyǵan baılanysty sarapshylar Býndıbýdjıo shtamyna arnaıy ázirlengen vaktsına bolmaǵan jaǵdaıda «Ervebony» randomızatsııalanǵan klınıkalyq synaqqa basym tártippen engizýdi usyndy.
Sarapshylar «Ervebonyń» Býndıbýdjıo vırýsy týdyratyn aýrýdyń aldyn alýda jáne vırýstyń taralýyn toqtatýda qanshalyqty tıimdi ekeni áli de dáleldeýdi qajet etetinin atap ótti. Bul shtamǵa arnaıy ázirlengen vaktsına ázirshe eń qolaıly nusqa bolyp qala beredi. Alaıda mundaı preparattarǵa qatysty aldyn ala derekter ázirshe joq.
DDU ókilderiniń aıtýynsha, tıisti derekter alynǵannan keıin vaktsınany keń kólemde óndirýdi jolǵa qoıyp, indetten zardap shekken halyq úshin vaktsınatsııanyń qoljetimdigin arttyrý kerek.
Eske salaıyq, buǵan deıin Kongoda Ebola indeti bosqyndarǵa arnalǵan lagerlerge taraǵanyn jazǵan edik.
Sondaı-aq Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetimen kúresti kúsheıtý úshin halyqaralyq qaýymdastyqty qosymsha qoldaý kórsetýge úndedi.
