DDU Ebolanyń sırek kezdesetin shtamyna qarsy jańa vaktsınalardyń tıimdiligin zerttep jatyr
ASTANA. KAZINFORM — Ebola vırýsyn erte anyqtaý jáne indetke qarsy sharalarǵa jergilikti qaýymdastyqtardyń belsendi qatysýy adam ómirin saqtap qalýda sheshýshi ról atqarady. Al jańa vaktsınalar men emdeý tásilderiniń tıimdiligi áli de zerttelip jatyr.
Bul týraly 29 mamyrda Dúnıejúzilik densaýlyq saqtaý uıymy (DDU) málimdedi, dep habarlaıdy BUU.
Ebolanyń jańa órshý oshaǵy anyqtalǵannan keıin eki apta ótken soń DDU Kongo demokratııalyq respýblıkasy aýmaǵynda vırýs juqtyrdy degen kúdikpen 906 jaǵdaı tirkelgenin habarlady.
Olardyń ishinde vırýspen baılanysty bolýy múmkin 223 ólim jaǵdaıy bar.
28 mamyrdaǵy jaǵdaı boıynsha elde Ebola vırýsyn juqtyrýdyń 125 rastalǵan deregi anyqtaldy.
Onyń 17-si ólimmen aıaqtalǵan.
Aýrý juqtyrǵandar Itýrı provıntsııasy, Soltústik Kıvý provıntsııasy jáne Ońtústik Kıvý provıntsııasy aýmaqtarynda tirkelgen.
Sonymen qatar kúmándi jaǵdaılardy zertteý jalǵasyp jatyr.
Ýgandada jeti adamnyń vırýs juqtyrǵany rastaldy.
Olardyń biri qaıtys bolǵan.
Úsh jaǵdaı Kongodan jetken.
Qalǵandary aýrý juqtyrǵandarmen baılanysta bolǵan adamdarǵa qatysty.
DDU málimetinshe, ázirge Ýganda aýmaǵynda ınfektsııanyń jergilikti deńgeıde taralý belgileri baıqalmaǵan.
BUU agenttikteri Kongo Demokratııalyq Respýblıkasy men kórshiles Ýgandaǵa Býndıbýdjıo dep atalatyn sırek shtammmen kúresýge qoldaý kórsetip jatyr.
Bul vırýs naýqas adammen jaqyn baılanys kezinde juǵady.
DDU indet taraǵan aımaqtarda vırýs juqtyrý qaýpine ushyraǵan adamdarǵa sapardan bas tartýǵa keńes beredi.
Alaıda uıym ázirge Kongo Demokratııalyq Respýblıkasy men Ýgandaǵa qatysty halyqaralyq saparlarǵa nemese saýdaǵa shekteý engizýdi qajet dep sanamaıdy.
Erte anyqtaý adam ómirin saqtaıdy
DDU-nyń vırýstyq gemorragııalyq qyzbalar jónindegi mamany Anaıs Legan adamdardyń kóbine syrqat týystaryna kómektesý kezinde vırýs juqtyratynyn aıtty.
Sondyqtan otbasylarǵa naýqas adamǵa tikeleı janasýǵa bolmaıtynyn túsindirý mańyzdy.
Jenevadaǵy brıfıngte sóılegen maman aýrýdyń aldyn alý jáne der kezinde medıtsınalyq kómekke júginýdiń mańyzyn atap ótti.
Onyń aıtýynsha, burynǵy indetter tájirıbesi boıynsha osy shtamdy juqtyrǵandardyń 30–50 paıyzy qaıtys bolǵan.
— On naýqastyń beseýi kóz jumýy múmkin. Bul óte joǵary kórsetkish, — dedi Anaıs Legan.
Sonymen qatar ol durys emdeý men erte dıagnostıka naýqastyń saýyǵý múmkindigin edáýir arttyratynyn aıtty.
Maman adamdarǵa aýrý belgilerin erte kezeńde tanýdy úıretý qajet ekenin atap ótti.
Onyń aıtýynsha, bul der kezinde medıtsınalyq kómek alýǵa múmkindik beredi.
Anaıs Legan jýyrda Kongoda Ebola juqtyrǵan bir naýqastyń tolyq jazylyp, aýrýhanadan shyǵarylǵanyn mysalǵa keltirdi.
DDU ókilderi Ebola vırýsynyń taralýyn toqtatýda jergilikti qaýymdastyqtardyń róli erekshe ekenin eske saldy.
Vaktsınalar men dáriler ázirge zerttelip jatyr
DDU mamandary vırýsqa qarsy vaktsınalar men emdeý tásilderin baǵalaý úshin halyqaralyq sarapshylar tobyn qurdy.
Klınıkalyq synaqtarǵa yqtımal emdeý quraly retinde MBP-134 jáne maftıvımab monoklonaldy antıdeneleri, sondaı-aq remdesıvır vırýsqa qarsy preparaty tańdaldy.
Vırýs juqtyrǵan adamdarmen baılanysta bolǵan azamattarǵa profılaktıkalyq maqsatta obeldesıvır preparatyn qoldaný múmkindigi de zertteledi.
Budan bólek, eki yqtımal vaktsına odan ári baǵalaýǵa irikteldi.
DDU Kongo Demokratııalyq Respýblıkasy men Ýganda úkimetterimen birlesip olardyń tıimdiligin zerttep jatyr.
Sonymen qatar indet oshaǵyndaǵy emdeý múmkindikteri keńeıtilip jatyr.
Qarýly qaqtyǵys indetpen kúresti qıyndatyp otyr
DDU málimetinshe, indet óte kúrdeli jaǵdaıda órship jatyr.
Vırýstyń negizgi oshaǵyna aınalǵan Itýrı provıntsııasynyń ózinde 1,2 mıllıon adam gýmanıtarlyq kómekke muqtaj.
Qarýly qaqtyǵystar men azyq-túlik tapshylyǵy medıtsına qyzmetkerleriniń jumysyn qıyndatqan.
— Negizgi másele resýrstyń jetispeýinde emes, zardap shekken aımaqtarǵa qol jetkizýdiń qıyndyǵynda, — dedi Anaıs Legan.
Onyń aıtýynsha, Itýrı provıntsııasynyń ákimshilik ortalyǵy sanalatyn Býnııa qalasynyń áýejaıy jabyq.
Kongo bıligi gýmanıtarlyq reısterge ruqsat bergenimen, operatsııalyq qıyndyqtar saqtalyp otyr.
Sonyń biri — janarmaı tapshylyǵy.
Buǵan deıin DDU bas dırektory Tedros Adanom Gebreıesýs shekarany jabý nemese elge kirýdi shekteý indettiń taralýyn tek ýaqytsha baıaýlatatynyn málimdegen bolatyn.
Ol mundaı sharalar máseleni túbegeıli sheshpeıtinin aıtty.
Sondyqtan DDSU Ebola vırýsyna baılanysty shekaralardy jabýdy usynbaıdy.
Uıymnyń baǵalaýynsha, indetpen kúrestegi eń tıimdi jol — sanıtarlyq sharalardy jedel engizý, medıtsınalyq baqylaýdy kúsheıtý jáne aýrý oshaqtaryna shuǵyl kómek kórsetý.
