DDU Ebola vırýsy sırek shtamynyń taralýyna baılanysty dabyl qaqty
ASTANA. KAZINFORM – Dúnıejúzilik densaýlyq saqtaý uıymy Ebola vırýsynyń sırek kezdesetin «Býndıbýgıo» shtamynyń taralýyna baılanysty pandemııa aldyndaǵy deńgeıge jaqyn tótenshe dabyl rejımin jarııalady, dep jazdy DW.
Kongo Demokratııalyq Respýblıkasy men Ýgandada taralǵan indet saldarynan 88 adam kóz jumdy. Aımaqta aýrýdyń 330-dan astam boljamdy jaǵdaıy tirkelgen.
DDU málimetinshe, naýqastardyń naqty sany budan da kóp bolýy múmkin. Osyǵan baılanysty uıym tótenshe jaǵdaı rejımin jarııalady. Bul – dabyl deńgeıi boıynsha ekinshi saty. Odan joǵary tek pandemııa deńgeıi ǵana bar.
Ebola vırýsynyń órshýi týraly 15 mamyrda Kongo Demokratııalyq Respýblıkasynyń Itýrı provıntsııasynyń bıligi habarlady. Atalǵan óńirde áskerı qaqtyǵystar jıi bolyp turady.
Kórshiles Ýgandada da Ebola juqtyrǵan er adam qaıtys boldy. Dárigerler onyń aǵzasynan «Býndıbýgıo» shtamyn anyqtaǵan.
Kongo Densaýlyq saqtaý mınıstri Samýel Roje Kambanyń aıtýynsha, vırýstyń bul túrine qarsy ázirge vaktsına da, arnaıy em de joq.
– Atalǵan shtamm kezinde ólim-jitim deńgeıi 50%-ǵa deıin jetedi, – dedi mınıstr.
Qazirgi indet Kongo Demokratııalyq Respýblıkasyndaǵy Ebolanyń 17-epıdemııasy bolyp otyr. Buǵan deıingi indet 2025 jyldyń tamyz aıynda tirkelip, 34 adam qaıtys bolǵan edi.
Eldegi eń iri Ebola indeti 2018-2020 jyldary bolǵan. Sol kezde shamamen 2300 adam kóz jumǵan. Sońǵy 50 jyl ishinde Afrıkada Ebola vırýsynan shamamen 15 myń adam qaıtys bolǵan.
Aıta keteıik, krýızdik laınerde tirkelgen hantavırýs jańa vaktsınany jasaýdy jedeldetti.
