DDU: Ebola indetiniń aýqymy resmı derekten birneshe ese kóp bolýy múmkin
ASTANA. KAZINFORM – Dúnıejúzilik densaýlyq saqtaý uıymy (DDU) Kongo Demokratııalyq Respýblıkasyndaǵy Ebola indetiniń naqty aýqymy resmı kórsetkishten eki-tórt ese joǵary bolýy múmkin ekenin málimdedi. Buǵan vırýs juqtyrý tizbekterin anyqtaýdaǵy qıyndyqtar sebep bolyp otyr, dep habarlaıdy WAM.
DDU-nyń Tótenshe jaǵdaılar jónindegi baǵdarlamasynyń atqarýshy dırektory Chıkve Ihekveazýdyń aıtýynsha, jańa juqtyrý jaǵdaılarynyń shamamen 80 paıyzy buryn anyqtalǵan naýqastarmen baılanystyrylmaı otyr. Bul, ásirese Itýrı provıntsııasynda vırýstyń qoǵam ishinde keńinen taralyp jatqanyn kórsetedi.
Úkimettiń resmı málimetine sáıkes, qazirgi ýaqytqa deıin Ebola vırýsyn juqtyrýdyń 1 792 rastalǵan jaǵdaıy tirkelgen. Onyń ishinde 625 adam qaıtys bolǵan.
Tirkelgen jaǵdaılardyń shamamen 90 paıyzy Itýrı provıntsııasyna tıesili. Sonymen qatar indet Soltústik Kıvý, Ońtústik Kıvý jáne Chopo provıntsııalaryna da taralǵan.
Chıkve Ihekveazýdyń aıtýynsha, Býnııa qalasynda júrgizilgen zerthanalyq taldaýlardyń nátıjeleri oń kórsetkishtiń joǵary deńgeıde saqtalyp otyrǵanyn kórsetedi. Bul basqa óńirlerde indettiń taralýyn tejeýde ilgerileý bolǵanyna qaramastan, atalǵan aımaqta vırýstyń áli de belsendi taralyp jatqanyn bildiredi.
Eske sala ketsek, buǵan deıin Kongo Demokratııalyq Respýblıkasynda Ebola juqtyrǵandar sany 1 700-den asqanyn jazdyq.
