DDU Ebola indetimen kúresý úshin 518 mln dollarlyq baǵdarlamany iske qosty
ASTANA. KAZINFORM – Dúnıejúzilik densaýlyq saqtaý uıymy jáne Afrıkanyń aýrýlardy baqylaý jáne aldyn alý ortalyqtary Afrıkada Ebola indetimen kúresý úshin quny 518 mln dollar alty aılyq jospardy jarııalady, dep habarlaıdy Reuters.
Afrıkada Ebola indeti 1976 jyldan beri aýqymy men saldary boıynsha tórtinshi eń iri indet retinde tanyldy.
Baǵdarlama aýrýdy juqtyrý jaǵdaılary tirkelgen Kongo Demokratııalyq Respýblıkasy men Ýgandany qoldaýǵa, sondaı-aq kórshiles elderdi vırýstyń yqtımal taralýyna daıyndaýǵa baǵyttalǵan. Qarastyrylǵan sharalar qatarynda shekaralardaǵy sanıtarlyq baqylaýdy kúsheıtý, testileýdi keńeıtý jáne medıtsınalyq qyzmetterdiń daıyndyǵyn arttyrý boldy.
DSU bas dırektory Tedros Adhanom Gebreıesýstiń málimdeýinshe, ınfektsııa jaýap sharalardan jyldamyraq taralyp otyr.
– Іndet tez taralyp keledi jáne biz áli de ilesýge tyrysyp jatyrmyz, - dep atap ótti uıym dırektory.
Onyń aıtýynsha, epıdemııany turaqty qarjylandyrý, úkimettiń qoldaýy jáne jergilikti qaýymdastyqtardyń senimi toqtatýǵa kómektesedi.
Kongo Demokratııalyq Respýblıkasynda aýrý juqtyrýdyń 452 jaǵdaıy jáne 82 ólim rastaldy. Kórshiles Ýgandada aýrý juqtyrýdyń 19 jaǵdaıy jáne eki ólim tirkelgen.
Qazirgi indet sırek kezdesetin Ebola vırýsynyń Býndıbýgıo shtamynan týyndaǵan. Qazirgi ýaqytta oǵan qarsy bekitilgen vaktsına nemese arnaıy emdeý ádisi joq. Dıagnostıka áli de kúrdeli másele bolyp qalyp otyr. Qoldanylatyn testter bul shtamdy birden anyqtaı bermeıdi jáne qorytyndylaryn alý birneshe kúnnen bir aptaǵa deıin nemese odan da kóp ýaqyt alýy múmkin.
Maýsym aıynyń basyndaǵy jaǵdaı boıynsha halyqaralyq donorlar epıdemııamen kúresýge 315,8 mln dollar bólýge ýáde berdi. Bul qarjylandyrýdyń qajetti somasynan aıtarlyqtaı tómen.
Osyǵan deıin Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetimen kúreske aldaǵy úsh aıda 115 mıllıon AQSh dollary qajet ekenin málimdedi.
