DDU: Ebola indeti kúrdeli, biraq pandemııa qaýpi joq
ASTANA. KAZINFORM – Dúnıejúzilik densaýlyq saqtaý uıymy Ortalyq Afrıkadaǵy Ebola vırýsynyń taralýyna baılanysty jaǵdaıdyń kúrdeli ekenin, alaıda pandemııa qaýpi ázirge joq ekenin málimdedi, dep jazdy DW.
DDU-nyń tótenshe jaǵdaılar komıtetiniń jetekshisi Lıýsıl Blýmbergtiń aıtýynsha, uıym indettiń ulttyq jáne óńirlik deńgeıdegi taralý qaýpin joǵary dep baǵalap otyr. Degenmen jahandyq qaýip deńgeıi tómen kúıinde jáne pandemııa jarııalaýǵa negiz joq.
– Ebola vırýsy aýa arqyly nemese kezdeısoq baılanys kezinde juqpaıdy. Ol qanmen jáne bıologııalyq suıyqtyqtarmen tikeleı baılanys arqyly taralady, – dedi Lıýsıl Blýmberg Jenevada ótken baspasóz máslıhatynda.
DDU sarapshysy Anaıs Legannyń aıtýynsha, indet birneshe aı buryn bastalǵan bolýy múmkin.
– Qazir eń mańyzdysy – juqtyrý tizbegin úzý, naýqastardy oqshaýlaý jáne barlyq kúdikti ári rastalǵan jaǵdaılarǵa medıtsınalyq kómek kórsetý, – dedi ol.
DDU bas dırektory Tedros Adhanom Gebreıesýs Kongo Demokratııalyq Respýblıkasy men ózge de elderde Ebola juqtyrýdyń shamamen 600 kúdikti jaǵdaıy tirkelgenin, 139 adamnyń qaıtys bolǵanyn málimdedi. Qaza tapqandar arasynda medıtsına qyzmetkerleri de bar.
Uıymnyń málimetinshe, birneshe ondaǵan jaǵdaı zerthanalyq jolmen rastalǵan. Alaıda naýqastardyń naqty sany budan áldeqaıda kóp bolýy múmkin.
Sonymen qatar Kongoda Ebola juqtyrǵan amerıkalyq dáriger Germanııaǵa evakýatsııalanyp, Berlındegi Charité klınıkasyna jetkizildi. Germanııa bıliginiń habarlaýynsha, AQSh ákimshiligi kómek surap júgingen.
Naýqas arnaıy oqshaýlanǵan bólimde em qabyldap jatyr. Berlın bıligi turǵyndar úshin qaýip joq ekenin málimdedi.
Buǵan deıin DDU Kongo Demokratııalyq Respýblıkasy men Ýgandada sırek kezdesetin «Býndıbýgıo» shtamynyń taralýyna baılanysty dabyl deńgeıin kótergen bolatyn. Uıym bul jaǵdaıdy «halyqaralyq mańyzy bar densaýlyq saqtaý salasyndaǵy tótenshe jaǵdaı» dep atady.
Mamandardyń aıtýynsha, vırýstyń bul túrine qarsy ázirge vaktsına da, arnaıy em de joq. Qazirgi qoldanystaǵy vaktsınalar Ebolanyń burynǵy shtamdaryna qarsy ázirlengen.
Ebola vırýsy kóbine ólimmen aıaqtalady. Buǵan deıingi indetter kezinde naýqastardyń 25%-dan 90%-ǵa deıini qaıtys bolǵan.
Aýrýdyń belgilerine dene qyzýynyń kóterilýi, bulshyqet aýyrýy, dıareıa, ishki qan ketý jáne aǵza músheleriniń isten shyǵýy jatady.
Jańa indet týraly alǵash ret 15 mamyrda Kongonyń soltústik-shyǵysyndaǵy Itýrı provıntsııasynyń bıligi habarlaǵan. Bul óńirde áskerı qaqtyǵystar jıi bolady.
DDU málimetinshe, Kongomen shekaralas on elge, ásirese Ýganda men Ońtústik Sýdanǵa qaýip joǵary. Uıym atalǵan memleketterdi Ebola jaǵdaılaryn erte anyqtap, shuǵyl emdeý sharalaryn kúsheıtýge shaqyrdy.
Aıta keteıik, qazirgi indet Kongo Demokratııalyq Respýblıkasyndaǵy Ebolanyń 17-epıdemııasy bolyp otyr. 2018-2020 jyldardaǵy eń iri indet kezinde shamamen 2300 adam qaıtys bolǵan edi. Sońǵy 50 jyl ishinde Afrıkada Eboladan shamamen 15 myń adam kóz jumǵan.
QR SІM Afrıkadaǵy ebola indetine baılanysty úndeý jasady.
