DDU dabyly: Eýropada tórt jylda aptap ystyqtan 200 myńnan astam adam kóz jumdy
ASTANA. KAZINFORM – Sońǵy tórt jylda Eýropada joǵary temperatýra saldarynan 200 myńnan astam adam kóz jumdy. Dúnıejúzilik densaýlyq saqtaý uıymy (DDU) óńir elderin halyqty aptap ystyqtan qorǵaý sharalaryn kúsheıtýge shaqyryp otyr, dep habarlaıdy DW.
DDU-nyń Eýropa boıynsha óńirlik dırektory Hans Klıýge Eýropa álemdegi kez kelgen basqa óńirge qaraǵanda jyldam jylyp jatqanyn málimdedi. Onyń aıtýynsha, klımattyń ózgerýi aptap ystyqtyń kúsheıýine ákelip, adamdardyń densaýlyǵyna eleýli qaýip tóndirip jatyr.
Berlınde Hans Klıýge Germanııanyń qorshaǵan orta mınıstri Karsten Shnaıder jáne densaýlyq saqtaý máseleleri jónindegi senator Inna Tsıborramen birge halyqty joǵary temperatýradan qorǵaýǵa arnalǵan DDU-nyń jańartylǵan usynymdaryn tanystyrdy.
Uıym parnıktik gazdar shyǵaryndylaryn azaıtyp, qalalardaǵy jasyl aımaqtardyń sanyn kóbeıtýdi usynady. Usynylǵan sharalardyń qatarynda saıabaqtardy damytý, aǵash otyrǵyzý, ózenderdi, ormandardy jáne batpaqty aýmaqtardy saqtaý bar. Mundaı tabıǵı nysandar eldi mekenderdegi aýa temperatýrasyn tómendetýge kómektesedi.
Berlın dárigerler palatasynyń prezıdenti Peter Bobbert azamattardy aptap ystyqtyń qaýpi týraly kóbirek aqparattandyrýǵa shaqyrdy. Onyń aıtýynsha, kóptegen adam joǵary temperatýranyń qaýiptiligin jete baǵalamaı, ystyq aýa raıyn jaıly qubylys retinde qabyldaıdy.
Maman kúnniń eń ystyq ýaqytynda uzaq ýaqyt kún astynda bolmaýǵa, dene belsendiligin tańerteńgi jáne keshki ýaqytqa aýystyrýǵa, sondaı-aq eń osal toptardyń biri sanalatyn qart adamdarǵa erekshe kóńil bólýge keńes berdi.
Sarapshylar sondaı-aq qalalarda qosymsha aýyzsý sýburqaqtaryn ornatyp, turǵyndar ystyqtan panalaı alatyn salqyn qoǵamdyq keńistikter qurýdy paıdaly shara dep sanaıdy.
DDU málimetinshe, ekstremaldy aptap ystyq jyl saıyn syrqattanýshylyqtyń artýyna, merziminen buryn bolatyn ólim-jitimge jáne mıllıardtaǵan ekonomıkalyq shyǵynǵa ákeledi. Eń úlken qaýipke egde jastaǵy adamdar, júkti áıelder jáne sozylmaly aýrýlary bar azamattar ushyraıdy.
Buǵan deıin Ispanııada mamyr aıynda aptap ystyq saldarynan 101 adamnyń qaıtys bolǵany habarlanǵan edi. Bul – sońǵy on jyldan astam ýaqyttaǵy kóktemniń sońǵy aıy úshin tirkelgen eń joǵary kórsetkish.
Sondaı-aq «Qazgıdromet» te elimizde aýa raıy kúrt nasharlaıtynyn, ıaǵnı burshaq pen aptap ystyq qatar júretinin eskertti.
