DDU dabyly: Ebolaǵa qarsy áreket indettiń taralýyna ilese almaı otyr
ASTANA. KAZINFORM – Dúnıejúzilik densaýlyq saqtaý uıymy Kongo Demokratııalyq Respýblıkasyndaǵy Ebola indetimen kúresti kúsheıtý úshin halyqaralyq qaýymdastyqty qosymsha qoldaý kórsetýge shaqyrdy, dep habarlaıdy Euronews.
DDU ókili Tarık ıAsarevıchtiń aıtýynsha, indettiń taralý qarqyny oǵan qarsy qabyldanyp jatqan sharalardan asyp túsip otyr.
– Ókinishke qaraı, indet áli de keńeıip jatyr jáne qazirgi áreket etý júıesiniń múmkindiginen asyp tústi. Bizge tek qarjylaı emes, basqa baǵyttar boıynsha da qosymsha qoldaý qajet. Emdeý ortalyqtarynyń, epıdemıologııalyq tergeý toptarynyń, qaýipsiz jerleý brıgadalarynyń jáne jergilikti qaýymdastyqtarmen jumys isteıtin qyzmetkerlerdiń áleýetin kúsheıtýimiz kerek, – dedi ol Jenevada ótken brıfıngte.
Qazirgi ýaqytta elde Ebola juqtyrýdyń 3 802 rastalǵan jaǵdaıy tirkelgen. Onyń ishinde 1 707 adam kóz jumǵan. Taǵy 727 naýqas saýyǵyp shyqsa, 275 kúmándi jaǵdaı boıynsha tekserý jalǵasyp jatyr.
Baqylaýǵa alynǵan 17 myńǵa jýyq baılanysta bolǵan adamnyń 80 paıyzdan astamy kún saıyn medıtsınalyq tekserýden ótedi.
Aýrý bes provıntsııada tirkelgenimen, jaǵdaılardyń shamamen 90 paıyzy Itýrı provıntsııasyna, qalǵanynyń basym bóligi Soltústik Kıvý provıntsııasyna tıesili.
Tarık ıAsarevıchtiń sózinshe, indetke qarsy sharalar eń aldymen vırýs keń taralǵan jáne taralý qaýpi joǵary aımaqtarǵa baǵyttalýy tıis.
Ebola – juqtyrǵan adammen nemese onyń bıologııalyq suıyqtyqtarymen tyǵyz baılanys kezinde beriletin vırýstyq gemorragııalyq qyzba.
KDR Ebola indetiniń 17-oshaǵy týraly bıyl 15 mamyrda Itýrı provıntsııasynda birneshe adamnyń qaıtys bolýynan keıin jarııalaǵan bolatyn.
Qazirgi indetke Ebola vırýsynyń Býndıbýdjo shtamy sebep bolyp otyr. Oǵan qarsy tıimdiligi dáleldengen emdeý tásili, vaktsına nemese baılanystan keıin qoldanylatyn aldyn alý quraly ázirge joq.
Soǵan qaramastan, áleýetti emdeý ádisteri, vaktsınalar jáne vırýsqa qarsy preparattar boıynsha birneshe klınıkalyq synaq júrgizilip jatyr.
DDU-nyń zertteýler men ázirlemeler baǵdarlamasynyń jetekshisi Vası Mýrtı alǵashqy nátıjelerdiń úmit kúttiretinin málimdedi.
Aıta keteıik, jýyrda ǵana DDU Kongo DR-daǵy Ebola vırýsyn el tarıhyndaǵy eń iri indetke aınalǵanyn málimdedi.
Sondaı-aq atalǵan uıym Ebola indetiniń aýqymy resmı derekten birneshe ese kóp bolýy múmkin ekenin de jarııa etti.
