DDU dabyl qaǵýyna sebep bolǵan Úndistanda shyǵarylǵan shárbat Qazaqstanǵa ákelingen joq

ASTANA. KAZINFORM – Dúnıejúzilik densaýlyq saqtaý uıymy Úndistanda jótelge arnalǵan úsh sapasyz shárbattyń tabylǵanyn jarııa etti. Atalǵan shárbat adam densaýlyǵyna qaýipti bolýy múmkin. Elimizdiń Densaýlyq saqtaý mınıstrliginiń málimetinshe, bul preparattar Qazaqstanda tirkelmegen.

Sóz Sresan Pharmaceutical, Rednex Pharmaceuticals jáne Shape Pharma kompanııalary óndirgen COLDRIF, Respifresh TR, ReLife shárbattary jaıynda bolyp otyr. Olardyń quramynan ýytty zat - dıetılenglıkol (DEG) anyqtalǵan. Shárbattar sýyq tııý, jótel jáne tumaýdan emdelý úshin nkeńinen qoldanylady.

Dúnıejúzilik densaýlyq saqtaý uıymynyń úndistandyq Sresan Pharmaceutical, Rednex Pharmaceuticals ı Shape Pharma kompanııalary óndirgen COLDRIF, Respifresh TR, ReLife shárbattarynan ýytty zat – dıetılenglıkol tabylǵany týraly eskertýine baılanysty Dárilik hattar men medıtsınalyq buıymdardy saraptaý ulttyq ortalyǵy habarlama jasady.

- Atalǵan preparattar Qazaqstan Respýblıkasynda memlekettik tirkeýden ótpegen. Olarǵa sáıkestik sertıfıkaty rásimdelgen joq, - dep atap ótti atalǵan ortalyqtan agenttik saýalyna oraı. 

Uıymnyń atap ótýinshe, atalǵan shárbattardy ishý ásirese balalarǵa asa qaýipti bolýy múmkin. 

- Azamattardy dárilik zattardy satyp alý kezinde barynsha saq bolýǵa shaqyramyz. Lıtsenzııa bar dárihanalardan ǵana preparattardy satyp alyńyzdar jáne atalǵan shárbattardy qoldanbańyzdar, - dep eskertti ortalyqtan.

Aıta keteıik, buǵan deıin DDU Úndistanda shyǵarylatyn jótelge qarsy shárbattardyń qaýpi týraly eskertken edi.