DDU basshysy: Vaktsına álem elderine ádil ári teńdeı taratylsa, pandemııa aıaqtalýy múmkin

NUR-SULTAN. QazAqparat - Dúnıejúzilik densaýlyq saqtaý uıymynyń basshysy Tedros Adhanom Gebreıesýs álem elderi vaktsınalardy taratý kezindegi ádiletsizdik pen teńsizdikterdi joısa, 2022 jyl koronavırýstyq pandemııanyń sońǵy jyly bolýy múmkin dep málimdedi dep habarlaıdy QazAqparat VVS saıtyna silteme jasap.

Gebreıesýs óziniń jańa jyldyq joldaýynda «Omıkron» kovıdiniń jańa nusqasynyń paıda bolý sebebin asyra ultshyldyq pen keıbir elderdegi vaktsınalardyń artyq qorymen baılanystyrdy. DDU jaqynda óz azamattaryna úshinshi ekpe alýdy usynǵan álemniń baı elderin birneshe ret synǵa aldy, al kóptegen aımaqtarda halyqtyń aıtarlyqtaı bóligi vaktsınanyń alǵashqy dozasyn da almaǵan.

DDU basshysynyń pikirinshe, ádildik qaǵıdaty neǵurlym uzaq buzylsa, biz aldyn - ala boljaı da almaıtyn vırýstyń odan ári ózgerý qaýpi soǵurlym joǵary bolmaq.
Sarapshylardyń pikirinshe, vırýstyń jańa mýtatsııasy onyń belsendi taralýy jaǵdaıynda, álemniń ártúrli elderinde kóbirek adamdar juqtyrǵan kezde paıda bolady. «Omıkronnyń» órshýi álemde aýrýdyń kúrt ósýine ákeldi, biraq aldyn-ala málimetter boıynsha álem boıynsha juqtyrǵan adamdar aýrýhanalarda az kezdesedi.