DDU basshysy pandemııaǵa qatysty shekteýlerdi báseńdetýge asyqpaýǵa shaqyrdy
NЬıÝ-IORK. QazAqparat – Dúnıejúzilik densaýlyq saqtaý uıymynyń basshysy Tedros Gebreıesýs COVID-19 pandemııasyna baılanysty engizilgen shekteýlerdi alyp tastaý máselesine óte saq qaraýǵa shaqyrdy. Birqatar elderde koronavırýstyń taralýy báseńdeı tústi. Osy oraıda, bılik ókilderi «áleýmettik qashyqtyqty» saqtaýǵa baǵyttalǵan sharalardy toqtatý týraly oılana bastady. Bul týraly BUU Jańalyqtar ortalyǵyna silteme jasap QazAqparat habarlaıdy.
Brıfıngte DDU basshysy COVID-19 – koronavırýstyń eń jańa tıpi ekenin, jáne medıtsınalyq qaýymdastyq ta, densaýlyq saqtaý qyzmetkerleri de ol týraly onymen kúres júrgizý barysynda tanysyp otyrǵanyn atap ótti. Al indetpen kúres strategııasy óz kezeginde eń sońǵy málimetterge negizdeledi. Vırýstyń qalaı qozǵalatynyn, ony qalaı toqtatý jáne odan qalaı qorǵaný kerektigin túrli elderdiń tájirıbesi kórsetýde.
«Biz COVID-19 óte tez taraıtynyn jáne ólimge aparatynyn bilip otyrmyz: ol 2009 jylǵy grıpp epıdemııasyna qaraǵanda 10 ese kóp adamdy óltirdi. Vırýs adamdar kóp jınalatyn jerlerde, mysaly, qarttar úıinde tez taralatynyn bilemiz. Vırýstyń taralýyn ustap qalý úshin árbir oqıǵany der kezinde anyqtap, test jasap, indet juqtyrǵan ár adamdy ýaqytyly oqshaýlaý jáne emdeý kerektigin bilemiz. Keıbir elderde aýrý juqtyrǵan adamdardyń sany árbir 3-4 kún saıyn eki eselenip jatqanyn bilip otyrmyz», - dedi Tedros Gebreıesýs.
Onyń aıtýynsha, qatań sharalardy kezeń-kezeńmen báseńdetý qajet. «Bul qadamǵa turaqty qatań baqylaý jasaı otyryp jáne densaýlyq saqtaý júıesi ınfektsııany juqtyrýdyń jańa jaǵdaılaryn ýaqytyly anyqtap, emdeı alatyn jaǵdaıda, sondaı-aq onyń qaıtalaný jaǵdaılaryna daıyn bolǵan kezde ǵana barý qajet», - dedi ol.
Bul rette keıbir elder shekteýlerdi jumsartý múmkindigin qarastyrsa, basqalary olardy engizý týraly oılanýda. Bul Latyn Amerıkasy, Afrıka jáne Azııadaǵy tabysy ortasha ján tómen elder.
«Men adamdar arasyndaǵy qashyqtyqty shekteý – aldyn alý úshin qajetti sharalar kesheniniń biri ǵana ekenin kóp ret aıttym. Árbir úkimet jaǵdaıdy baǵalap, óz azamattaryn qorǵaı alý kerek», - dedi DDU basshysy.
Doktor Tedros DDU COVID-19 indetine baılanysty shekteýlerdi alyp tastaýǵa negiz bolatyn alty jaǵdaı jazylǵan jańartylǵan strategııany jarııalaıtynyn aıtty.
