DDU basshysy koronavırýstyń qazirgiden de qaýipti shtamy paıda bolýyn eskertti

MÁSKEÝ. TASS- QazAqparat – Dúnıejúzilik densaýlyq saqtaý uıymynyń (DDU) dırektory Tedros Adan Gebreıesýs delta nusqasynan da qaýipti shtamynyń paıda bolý qaýpi týraly eskertti, dep habarlaıdy QazAqparat TASS agenttigine silteme jasap.

Bul týraly ol sársenbide Tokıoda Halyqaralyq Olımpıada komıtetiniń (HOK) 138-sessııasynda sóılegen sózinde aıtty.

«Vırýs keńinen taralǵan saıyn, onyń delta nusqasyna qaraǵanda qaýiptirek nusqasy paıda bolýy múmkin. Mundaı nusqalary kóbeıgen saıyn, olardyń bireýi bolmasa bireýine vaktsınamyz qarsy tura almaı qalýy yqtımal. Sonyń saldarynan biz áý bastaǵy jaǵdaıymyzǵa túsip, qaıta basynan bastaýǵa týra keledi», – dedi ol.

DDU dırektory odan «Pandemııa qashan aıaqtalady?» dep jıi suraq qoıylatynyn aıtty.

«Shynynda da, kovıd pen pandemııa bizdi kóptegen máselege betpe-bet ákeldi... Pandemııa – bul synaq jáne álem ony jeńe almaı jatyr», – dedi ol.

Gebreıesýs álemniń pandemııany toqtata almaı otyrǵanynyń ózindik sebebi bar dedi. «Barlyq qajetti quraldar bar» bolǵanymen, «naqty saıası mindettemelerdiń joqtyǵynan» osyndaı jaǵdaı oryn alyp otyrǵanyn alǵa tartty.

«Elderdiń úkimetteri, ásirese G20, ujymdyq erik-jiger tanytyp, adam ómirin saqtap qalý úshin barlyq sharany qoldanýy kerek. Olar vaktsınamen bólisip, vırýsty aldyn alýǵa stımýl berse, pandemııany birneshe aıda baqylaýǵa ala alady», – dep qosty ol.