DDU basshysy: Álemde koronavırýs órship barady
BRıÝSSELЬ. QazAqparat – Eýropada koronavırýstyń jaıylýy saıabyrsydy, alaıda álemdegi ahýal kóńil kónshitpeıdi. Bul týraly dúısenbi kúni onlaın-brıfıng barysynda Dúnıejúzilik densaýlyq saqtaý uıymynyń basshysy Tedros Adhanom Gebreıesýs málimdedi, dep habarlaıdy QazAqparattyń menshikti tilshisi.
«DDU keltirgen derekterge saı, qazirge deıin 7 mln adamnan koronavırýs anyqtaldy jáne bul indetten 400 myń adam kóz jumǵan. Eýropada jaǵdaı jaqsara túskenimen, jahandyq deńgeıde ahýal nasharlap barady», - dedi Gebreıesýs.
Onyń aıtýynsha, sońǵy 9 kúnde táýlik saıyn KVI anyqtalǵan adam sany 100 myńnan asyp túsip otyrǵan. Al jeksenbi kúni, tipti, bul tsıfr 136 myńǵa jetken.
«Keshe anyqtalǵan barlyq aýrý sanynyń 75 paıyzy 10 memleketke tıesili, kóbi — Amerıka jáne Ońtústik Azııa elderi», - deıdi DDU basshysy.
Odan bólek, spıker Afrıka elderinde de jaǵdaı máz emestigin jetkizdi. Jáne de Shyǵys Eýropa men Ortalyq Azııa elderinde indet kórsetkishi ósip kele jatqanyn aıtty.
