DDU basshysy Gazǵa medıtsınalyq kómektiń kedergisiz jetkizilýin qamtamasyz etýge shaqyrdy
ASTANA. KAZINFORM — Dúnıejúzilik densaýlyq saqtaý uıymynyń (DDSU) bas dırektory Tedros Adanom Gebreıesýs Gaza sektoryna turaqty, úzdiksiz jáne kúsheıtilgen medıtsınalyq kómektiń jetkizilýi qajet ekenin málimdedi, dep habarlaıdy Anadoly.
Gebreıesýs Izraıl shabýylyna ushyrap, ashtyqqa tap bolǵan Gaza sektoryndaǵy jaǵdaıǵa qatysty X platformasynda (burynǵy Twitter) tıisti málimdeme jasady.
Ol 1 tamyzdan bastap DDSU Gazaǵa medıtsınalyq qural-jabdyq tıelgen 24 júk kóligi jetkizgenin habarlady. Bul kólikterde bazalyq dári-dármekter men basqa da qajetti medıtsınalyq zattar bolǵan, olar medıtsınalyq ortalyqtar men aýrýhanalarǵa taratylady.
— Biz medıtsınalyq kómektiń turaqty, úzdiksiz jáne kúsheıtilgen tasymalyn talap etemiz. Bul — búkil Gazadaǵy adamdardyń ómirine tikeleı áser etedi, — dedi DDSU basshysy.
Izraıl engizgen qatań blokada jaǵdaıynda turǵan Gaza sektory gýmanıtarlyq apatty bastan ótkerýde: ashtyq jaıylyp, aýyz sý, dári-dármek, medıtsınalyq jáne gıgıenalyq quraldar jetispeıdi.
Ashtyqtan kóz jumǵandar sany artyp keledi, ásirese balalar arasynda.
2023 jyldyń 7 qazanynan beri Gazada ashtyq saldarynan 169 adam, sonyń ishinde 93 bala qaza tapqan.
Jergilikti jáne halyqaralyq derekkózder Izraıldiń «ashtyq pen shóldi qarý retinde» qoldanyp otyrǵanyn málimdeýde.