DDU aýanyń lastanýynan kóz jumatyn balalar sanyn atady
ASTANA. QazAqparat - Jyl saıyn bes jasqa deıingi 1,7 mıllıon bala qorshaǵan ortanyń lastanýynan kóz jumady, bul dúnıejúzi boıynsha balalar óliminiń tórtten birin quraıdy.
Bul týraly «RIA Novostı» agenttigi Dúnıejúzilik densaýlyq saqtaý uıymyna (DDU) silteme jasap habarlady.
«Jyl saıyn lastanǵan ortamen baılanysty qaýip-qaterlerden, sonyń ishinde turǵyn úı ishindegi jáne syrttaǵy aýanyń lastanýynan, yryqsyz shylym shegýden, tazartylmaǵan sýdan, sanıtarlyq talaptardyń saqtalmaýynan bes jasqa deıingi 1,7 mıllıon bala kóz jumady», - delingen DDU baıandamasynda.
Uıym qorshaǵan ortanyń qolaısyz jaǵdaıymen baılanysty balalar óliminiń bes negizgi sebebin atady. Birinshi orynda respıratorlyq aýrýlar, syrqat saldarynan 570 myń bala qaıtys bolady. Taǵy 360 myńnan astam bala sapasyz sýdan, sanıtarııa men gıgıenanyń saqtalmaýynan týyndaıtyn asqazan aýrýlarynan kóz jumady.
