DDU assambleıasy: Qazaqstan koronavırýspen kúres tájirıbesin bólisti
«Dúnıejúzilik densaýlyq saqtaý uıymyna COVID-19 daıyndyq, halyqty aqparattandyrý men ózge de mańyzdy taqyryptar jóninde bergen tehnıkalyq usynymdary úshin alǵys aıtamyz. Biz júıeni nyǵaıtý úshin sharalar jasadyq. COVID-19 vırýsymen kúreske bastapqy medıtsınalyq-sanıtarlyq kómek kórsetýdi qostyq. Juqtyrý jaǵdaılaryn toqtatý úshin barlyǵyn jasap jatyrmyz, álsiz toptarǵa kóńil bólýdemiz. Taǵy bir mańyzdy másele - tsıfrlyq tehnologııalardy keńinen qoldaný. Bul koronavırýspen tıimdi kúresý úshin jańa múmkindikterdi beredi», - dedi QR DSM Taýarlar men qyzmetterdiń qaýipsizdigi men sapasyn baqylaý komıtetiniń tóraǵasy Tımýr Sultanǵazıev Dúnıejúzilik densaýlyq saqtaý assambleıasynyń 73-sessııasynda.
Spıker Qazaqstannyń bastapqy medıtsınalyq-sanıtarlyq kómek róline qatysty barlyq erejege aıryqsha mán beretinin atap ótti.
«Munda bastapqy medıtsınalyq-sanıtarlyq kómektiń mańyzdy ekenin basa aıtqym keledi. Ol koronavırýspen kúreste aıryqsha ról atqarady. Bastapqy medıtsınalyq-sanıtarlyq kómek salasynda bekitilgen basty ustanymdardy saqtaý qajet. Barlyǵymyz COVID-19 qarsy kúreste birigip, vaktsına men tıimdi emdeý tásilderin jasaýymyz kerek. Barlyq medıtsınalyq qyzmetkerge jankeshti eńbegi úshin alǵys aıtqymyz keledi, bul daǵdarysty birlesip qana jeńe alamyz», - dedi T. Sultanǵazıev.